तीन दिनदेखि सप्तकोसीमा बेपत्ता गोताखोर सुरजको शव भेटियो

सप्तकोसी नदीमा ३ दिनदेखि बेपत्ता गोताखोर सुरज साउदको शव फेला परेको छ।

आइतबार कोसी ब्यारेजको ५५ नम्बर ढोका नजिकबाट उनको शव निकालिएको सशस्त्र प्रहरीका सहप्रवक्ता डीएसपी शैलेन्द्र थापाले नेपालखबरलाई जानकारी दिए।

उनीसँगै सप्तकोसीमा अभ्यास गर्ने क्रममा डुबेका झापाका हरदेव राजवंशीको शव भने शुक्रबार नै फेला परेको थियो।

उनीहरू शनिबार हुने डेमो प्रदर्शनका लागि अभ्यास गर्न बिहीबार सप्तकोसी नदीमा पसेका थिए। दुवै जना सशस्त्र प्रहरीका जवान हुन्। 

तर अभ्यासको अन्तिम चरणमा नदीभित्र पसेका राजवंशी र साउद बेपत्ता भएका थिए। राजवंशी दुई वर्ष पहिले र साउद एक वर्ष पहिले गोताखोरको तालिम गरेर उद्धारमा खटिरहेका थिए। 

तर त्यस दिन उनीहरूको सहायताका लागि प्रयोग गरिएको डोरी चुँडियो भने त्यसको केही बेरपछि अक्सिजनको सिलिन्डर पनि पानीमा तैरियो। अनि दुई जना नदीमै हराए। 

राजवंशीको शव शुक्रबार नै राजविराजमा पोस्टमार्टमपछि आफन्तले लगेर दाहसंस्कार गरिसकेका छन्।

तर उनीसँगै नदीमा हेलिएका साउद फेला नपरेपछि खोजीका लागि कुरिनटारबाट थप जनशक्ति पठाइएको थियो।

डीएसपी पुरुषोत्तम भण्डारी नेतृत्वको टोलीले आइतबार साउदको पनि शव फेला पारेको हो। भण्डारी बंगलादेशमा तालिम गरेर फर्किएका गोताखोर हुन्।

आइतबार मृत फेला परेका साउद नम्बर १३ गण पर्सा दरबन्दी भई नम्बर २ छिन्नमस्ता बाहिनी मुख्यालयमा कार्यरत थिए।

घटनाको विस्तृत विवरण: हेर्दाहेर्दै डोरी चुँडियो, अक्सिजनको सिलिन्डर तैरियो अनि सप्तकोसीमा हराए हरदेव र सुरज