तिनाउ खोलामा बेपत्ता भारतीय किशोरको शव भेटियो

पाल्पाको तिनाउ गाउँपालिका-३ स्थित तिनाउ खोलाको ड्यामसाइडमा पौडी खेल्ने क्रममा डुबेर बेपत्ता भएका भारतीय किशोरको शव फेला परेको छ। 

खोजीका क्रममा नेपाली सेना र सशस्त्र प्रहरीको संयुक्त टोलीले  १८ वर्षीय सोयव अन्सारीको शव भेट्टाएको हो। 

अन्सारी यही जेठ ८ गतेदेखि नदीमा हराइरहेका थिए।

भारतको नौतुना घर भएका अन्सारी नेपाल भ्रमणका लागि आएका थिए। 

उनको शव नेपाली सेना र सशस्त्र प्रहरी बल नेपाल सुरक्षा बेस बुटलबाट सशस्त्र प्रहरी नायब निरीक्षकको कमान्डमा खटिएको विपद् व्यवस्थापन तालिम प्राप्त सुरक्षा फौजले जेठ ९ गते दिउँसो करिब पौने ३ बजे फेला पारेको हो।