बाँकेमा कुटपिट गरेर १ जनाको हत्या, आरोपी १ पक्राउ, अन्य फरार

बाँकेमा एक जनाको हत्या भएको छ। कोहलपुर नगरपालिका- ७ रजगरूवा बस्ने ४० वर्षीय दुर्गा पुनको हत्या भएको हो। 

पुनको हत्यामा संलग्न भएको अभियोगमा कोहलपुर नगरपालिका-७ सल्यानी टोल बस्ने २३ वर्षीय छोटे भन्ने राजु सुनारलाई बिहीबार राति प्रहरीले पक्राउ गरेको छ।

राजुसहित ५/६ जनाको समूहले कुटपिट गर्दा गम्भीर घाइते भएका पुनकाे नर्सिङ होम नेपालगंजमा उपचारको क्रममा मृत्यु भएको प्रहरीले जनाएको छ। 

घटनाको जानकारीपछि अस्थायी प्रहरी चौकी हवल्दारपुर र इलाका प्रहरी कार्यालय कोहलपुरबाट खटिएको प्रहरीले कुटपिटमा संलग्न मध्ये राजुलाई पक्राउ गरेको हो।

प्रहरीले फरार अन्य व्यक्तिहरूको खोजी गर्नुका साथै घटनाका  सम्बन्धमा आवश्यक अनुसन्धान गरिरहेको जनाएको छ।