युनिकोड
प्रहरीले काठमाडौँको लाजिम्पाटस्थित पानी पोखरीमा घरजग्गा व्यवसायी नुवाकोटको ककनी गाउँपालिका-६ घर भई टोखा नगरपालिका-३ ग्रान्डी बस्ने ३५ वर्षीय विक्रम लामालाई आक्रमण गरेको आरोपमा थप एक जनालाई पक्राउ गरेको छ।
जिल्ला प्रहरी परिसर काठमाडौँका प्रवक्ता एवं प्रहरी उपरीक्षक नवराज अधिकारीका अनुसार गोरखाको फुजेल घर भएका निश्चल सुनारलाई जिल्ला प्रहरी कार्यालय झापासँगको समन्वयमा आज पक्राउ गरी काठमाडौँ ल्याइएको हो।
उनले भने, ‘गत कात्तिक ११ गते घरजग्गा व्यवसायी लामामाथि आक्रमण गरेको आरोपमा निजलाई झापाबाट पक्राउ गरी आज काठमाडौँ ल्याएका छौँ।’
लामालाई आक्रमण गरेको आरोपमा प्रहरीले यसअघि शैलेन्द्र तामाङ उर्फ मार्सल पक्राउ गरी उनीविरुद्ध अभद्र व्यवहारमा मुद्दा चलाएको छ। अदालतको आदेशमा मार्सल थुनामा गएको प्रहरीले जनाएको छ।
लाजिम्पाटस्थित इनोभा अस्पतालको पार्किङमा विक्रमलाई गत कात्तिक ११ गते चार जनाको समूह मिलेर रड प्रहार गरेर निर्घात कुटपिट गरेको सीसीटीभी फुटेजमा देखिएको प्रवक्ता एवं प्रहरी उपरीक्षक अधिकारीले बताए। रासस
प्रतिक्रिया