तीव्र गतिको मोटरसाइकल पल्टिँदा चालकको मृत्यु

नवलपरासी पश्चिममा मोटरसाइकल दुर्घटना हुँदा चालकको मृत्यु भएको छ। 

गएराति करिब ८ बजे सुस्ता गाउँपालिका- २ सतपतीस्थित भित्री सडकमा लु १८ प ५८४९ नम्बरको मोटरसाइकल आफैँ अनियन्त्रित भएर दुर्घटना हुँदा चालकको मृत्यु भएको हो। 

मृत्यु हुनेमा सुस्ता- २ महलबारी बस्ने वर्ष ४५ को दलबहादुर चौधरी रहेका जिल्ला प्रहरी कार्यालय नवलपरासी पश्चिमले जनाएको छ। तीव्र गतिको कारण मोटरसाइकल दुर्घटना भएको अनुमान प्रहरीले गरेको छ।

दुर्घटनामा गम्भीर घाइते भएका चौधरीलाई उपचारको लागि क्रिमसन हस्पिटल मणिग्राम लगिएको थियो। उनको उपचारको क्रममा मृत्यु भएको प्रहरी नायव उपरीक्षक रेशम बोहराले जानकारी दिए। 

चौधरीको शव परीक्षणको लागि हाल सोही अस्पतालमा राखिएको छ।