काठमाडौँ आउँदै गरेको टाटासुमो रामेछापमा पल्टियो, एकै घरका ३ जना घाइते

रामेछापको खाँडादेवीमा टाटासुमो दुर्घटना हुँदा एकै घरका तीनजना घाइते भएका छन्। 

आज बिहान खाँडादेवी गाउँपालिका– ९ पिङखुरीबाट काठमाडौँ आउँदै गरेको  ना.१ज ५६२६ नम्बरको टाटासुमो खाँडादेवी ८ भदौरेमा दुर्घटना भएको जिल्ला प्रहरी कार्यालय रामेछापले जनाएको छ। गाडी सडकबाट झण्डै ३० मिटर तल भीरमा खसेको छ।

दुर्घटनामा स्थानीय २४ वर्षीय दीपेन्द्र भण्डारी, १६ वर्षीया एलिसा भण्डारी र १४ वर्षीया एमुना भण्डारी घाइते भएका छन्। घाइतेमध्ये दीपेन्द्र भण्डारीको अवस्था गम्भीर रहेकाले उपचारका लागि ललितपुरको बीएन्डबी अस्पताल पठाइएको जिल्ला प्रहरी कार्यालय रामेछापले जनाएको छ। 

दुर्घटनापछि टाटासुमो चालक २२ वर्षीय विष्णु भण्डारीलाई प्रहरीले नियन्त्रणमा लिएको छ।