युनिकोड
पश्चिमी निम्न चापीय प्रणालीको प्रभाव रहे पनि आज (आइतबार) देशका धेरै ठाउँमा घाम लाग्ने सम्भावना रहेको मौसमविद्ले बताएका छन्।
मौसम पूर्वानुमान महाशाखाकी मौसमविद् विभूति पोखरेलका अनुसार पश्चिमी निम्न चापीय प्रणालीको प्रभावले अहिले मध्य र पूर्वी क्षेत्रका पहाडी भेगमा मात्र मौसम आंशिक बदली भएको छ। यसबाहेक देशका अन्य स्थानमा मौसम सामान्यतया सफा छ।
‘दिउँसो देशका धेरै स्थानमा घाम देखिने सम्भावना छ,’ मौसमविद् पोखरेलले आइतबार बिहान नेपालखबरसँग भनिन्, ‘तैपनि आंशिक बदली हुने भएकाले बेलाबेला बादल पनि देखिने हुन्छ।’
तर आज पानी पर्ने सम्भावना भने एकदमै कम रहेको उनले बताइन्। ‘उच्च पहाडी तथा हिमाली भेगका सीमित स्थानमा हिमपात हुन सक्छ,’ उनले भनिन्।
अहिले सुदूरपश्चिमबाहेक देशका अन्य तराई भूभागमा हुस्सु/कुहिरो पनि लागेको छैन। ‘सुदूरपश्चिम तराईको हुस्सु पनि बिस्तारै हटेर जाने सम्भावना छ,’ मौसमविद् पोखरेलले भनिन्।
आगामी ३ दिनको मौसम पूर्वानुमान
माघ १९ गते आइतबार
दिउँसो : पूर्वी तथा मध्य पहाडी भूभागमा आंशिक बदली रही बाँकी भूभागमा मौसम सामान्यतया सफा रहनेछ।
राति : देशभर मौसम सामान्यतया सफा रहनेछ।
माघ २० गते सोमबार
दिउँसो : पूर्वी तथा मध्य नेपालका भूभागमा आंशिक बदली रही बाँकी भूभागमा मौसम सामान्यतया सफा रहनेछ।
राति : देशभर मौसम सामान्यतया सफा रहनेछ।
माघ २१ गते मंगलबार
दिउँसो : देशभर आंशिक बदली रहनेछ । देशको पहाडी भूभागका एक वा दुई स्थानमा हल्का वर्षाको सम्भावना छ।
राति : देशको पश्चिमी भूभागमा सामान्य बदली र बाँकी भूभागमा आंशिक बदली रहनेछ। देशको पश्चिमी पहाडी भूभागका थोरै स्थानमा हल्का वर्षा हुने सम्भावना छ। पश्चिमी उच्च पहाडी तथा हिमाली भूभागका थोरै स्थानमा हल्का हिमपात हुने सम्भावना छ।
स्रोत : जल तथा मौसम विज्ञान विभाग, मौसम पूर्वानुमान महाशाखा, काठमाडौं
प्रतिक्रिया