युनिकोड
वैदेशिक रोजगारीका लागि पोल्यान्ड पठाइदिने भन्दै ठगी गरेको आरोपमा एक महिला पक्राउ परेकी छन्।
पक्राउ पर्नेमा भक्तपुर नगरपालिका १० घर भई हाल काठमाडौंको नागार्जुन नगरपालिका–६ रामकोट बस्ने वर्ष ३९ की सुनिता कर्माचार्य रहेकी छन्।
कर्माचार्य समेतले मदनराज मोक्तान समेत १७ जनालाई वैदेशिक रोजगारीको लागि पोल्यान्ड पठाईदिन्छु त्यसको लागि प्रतिव्यक्ति रु. ८ लाख रुपैयाँ मात्र लाग्छ, पोल्याण्ड पुगेपछि प्रतिष्ठित कम्पनीमा काम लगाइदिन्छु, मासिक एक लाख पचास हजार रुपैयाँ तलव हुन्छ भनी विश्वास दिलाई प्रलोभनमा पारी ठगी गरेको प्रहरीले जनाएको छ।
उनीहरुले पीडितहरुबाट पटकपटक गरी ३८ लाख रुपैयाँ रकम लिई सम्पर्क विहीन भई ठगी गरेको अनुसन्धानका क्रममा खुलेको छ।
वैदेशिक रोजगार विभागबाट महानगरीय अपराध अनुसन्धान कार्यालयलाई पक्राउ गरी उपस्थित गराइदिन पत्राचार भएको थियो। अपराध अनुसन्धान कार्यालयबाट खटिएको प्रहरी टोलीले सुनिताको खोजतलास गर्ने क्रममा मंगलबार काठमाडौंको ईन्द्रचोकबाट पक्राउ गरेको हो।
उनीविरुद्ध थप अनुसन्धान तथा कारबाहीका लागि वैदेशिक रोजगार विभाग ताहाचल, काठमाडौं पठाइएको प्रहरीले जनाएको छ।
प्रतिक्रिया