युनिकोड
बिहीबारदेखि जारी हिमपात र वर्षा देशका कतिपय स्थानमा अझै रोकिएको छैन। तर आज (शनिबार)देखि मौसम क्रमिक रूपमा सुधार हुँदै जाने मौसमविद्ले बताएका छन्।
मौसम पूर्वानुमान महाशाखाकी मौसमविद् शान्ति कँडेलका अनुसार अहिले पनि देशको पश्चिमी क्षेत्रका केही स्थानमा वर्षा र हिमपात भइरहेको छ।
‘सुर्खेत दिपायल आसपास अहिले पनि वर्षा जारी छ,’ मौसमविद् कँडेलले शनिबार बिहान नेपालखबरसँग भनिन्, ‘साथै पश्चिमी क्षेत्रका उच्च पहाडी तथा हिमाली क्षेत्रमा हिमपात पनि भइरहेको छ।’
उनका अनुसार यसबाहेक देशका अन्य स्थानमा मौसम बदली भएको भए पनि वर्षा तथा हिमपात भएको छैन।
‘आजबाट मौसम क्रमिक रूपमा सुधार हँदै जाने देखिन्छ,’ मौसमविद् कँडेलले भनिन्, ‘तर पूर्ण रूपमा खुल्ले सम्भावना छैन।’
पश्चिमी वायुबाट विकसित न्यून चापीय प्रणालीकाे प्रभावले नेपालमा मौसम बदली भइरहेको हो।
आज पनि काठमाडौं उपत्यकालगायत मध्य क्षेत्रका केही स्थान, पूर्वका पनि केही स्थानमा हल्का वर्षाको सम्भावना रहेको उनले बताइन्।
‘हिजो (शुक्रबार)जस्तो भारी हिमपात तथा वर्षा आज हुँदैन, हल्का किसिमको हुन्छ,’ उनले भनिन्, ‘बीचबीचमा वर्षा रोकिने र कतिपय स्थानमा घाम पनि देखिने सम्भावना छ।’
माैसम पूर्वानुमान महाशाखाले कम्तीमा आगामी २४ घण्टा वर्षा/हिमपातकाे सम्भावना औंल्याएको छ।
शनिबार बिहान ६ बजे आगामी २४ घण्टाका लागि चेतावनी तथा परामर्श जारी गर्दै महाशाखाले यसाे भनेकाे छ : देशका थोरै स्थानमा हल्का वर्षासाथै केही उच्च पहाडी तथा हिमाली भेगमा हल्का हिमपातका सम्भावना रहेकाले आवश्यक सतर्कता अपनाउन तथा यसबाट हुने चिसोबाट बच्न सर्वसाधारण सबैलाई अनुरोध छ।
काठमाडौंमा कुहिरो
अहिले बिहान काठमाडौं उपत्यकालगायत पहाडी क्षेत्र कुहिरोले ढाकेको छ।
तराईमा क्षेत्रमा पनि अहिले हुस्सु लागेको मौसमविद् शान्ति कँडेलले जानकारी दिइन्।
यो बिहान ९/१० बजेपछि क्रमश: हटेर जाने उनको अनुमान छ।
मौसमविद्का अनुसार पानी परेपछि त्यो वाफ बनेर उड्ने भएका कारण कुहिरो/हुस्सु लाग्ने गर्छ।
मौसमविद् कँडेलका अनुसार शनिबार बिहान ५:४५ बजेको मापनअनुसार काठमाडौं उपत्यकाको न्यूनतम तामपक्रम ६.४ डिग्री सेल्सियस छ।
कहाँ कति भयाे वर्षा?
देशभरिमा सबैभभन्दा बढी वर्षा वीरेन्द्रनगरमा भएको छ।
मौसम पूर्वानुमान महाशाखाको शुक्रबार साँझसम्मको तथ्यांकअनुसार वीरेन्द्रनगरमा ६० मिलिमिटर वर्षा भएको हो।
यसपछि दोस्रोमा सबैभन्दा बढी काठमाडौं उपत्यकामा पानी परेको छ। महाशााखको तथ्यांकअनुसार उपत्यकामा ४८ मिलिमिटर वर्षा भएको हो।
तेस्रोमा लुम्लेमा ४५ दशमलव ५ मिलमिटर, चौथोमा भैरहवामा ४१ दशमलव ३ मिलिमिटर तथा पाँचौंमा धनगढीमा ३८ दशमलव ९ मिलिमिटर वर्षा भएको शुक्रबार साँझ ५ः४५ को बुलेटिनमा महाशाखाले उल्लेख गरेको छ।
यसबाहेक अन्य स्थानमा २६ मिलिमिटरभन्दा कम वर्षा भएको छ।
आगामी तीन दिनको मौसम पूर्वानुमान :
माघ ४ गते (शनिबार)
दिउँसो : देशभर आंशिकदेखि सामान्यसम्म बदली रहनेछ। पहाडी तथा तराई भू-भागका थोरै स्थानमा हल्का वर्षा हुने देखिन्छ भने उच्च पहाडी तथा हिमाली भेगका केही स्थानमा हल्का हिमपातको सम्भावना छ।
राति : देशको पहाडी भू-भागमा आंशिकदेखि सामान्यसम्म बदली र तराईका भू-भागमा आंशिक बदली भई पहाडी भू-भागका थोरै स्थानमा हल्का वर्षा हुन सक्ने सम्भावना छ।
माघ ५ गते (आइतबार)
दिउँसो : देशभर सामान्यतया सफा तथा आंशिक बदली भई पहाडी भू-भागका थोरै स्थानमा हल्का वर्षा हुने सम्भावना छ।
राति : देशभर सामान्यतया सफा तथा आंशिक बदली भई पहाडी भू-भागका १-२ स्थानहरुमा हल्का वर्षा हुन सक्ने संभावना रहेको छ ।
माघ ६ गते (सोमबार)
दिउँसो : देशभर सामान्यतया सफा तथा आंशिकसम्म बदली भई पहाडी भू-भागका १-२ स्थानमा हल्का वर्षा हुने सम्भावना छ।
राति : देशभर आंशिकदेखि सामान्यसम्म बदली भई पश्चिमी पहाडी भू-भागका १-२ स्थानमा हल्का वर्षा हुने सम्भावना छ।
स्रोत : जल तथा मौसम विज्ञान विभाग, मौसम पूर्वानुमान महाशाखा
याे पनि पढ्नुहाेस् :
हिउँदे वर्षाको प्रभावः अन्तर्राष्ट्रिय विमान कोलकत्ता र ढाकातर्फ डाइभर्ट, राजमार्ग अवरुद्ध
प्रतिक्रिया