युनिकोड
जनता समाजवादी पार्टी (जसपा)को शीर्ष ६ नेताको बैठक बस्दै छ।
दिउँसो २ बजे पार्टी कार्यालय बालकुमारीमा बस्ने बैठकले नयाँ सत्ता समीकरणका विषयमा नेपाली कांग्रेसले राखेको प्रस्तावमाथि छलफल गरेर निर्णय गर्ने तयारी छ।
छलफलमा जसपाका अध्यक्षद्वय महन्थ ठाकुर र उपेन्द्र यादव, संघीय परिषद् सदस्य डा. बाबुराम भट्टराई, वरिष्ठ नेता अशोक राई, राजेन्द्र महतो र राजेन्द्र श्रेष्ठ सहभागी हुने ठाकुरको सचिवालयले जानकारी दिएको छ।
आइतबार दिउँसो सोही समयमा नेपाली कांग्रेसको समेत पदाधिकारी बैठक बस्दै छ।
शुक्रबार कांग्रेसका सभापति शेरबहादुर देउवाले माओवादी केन्द्र र जसपाका नेताहरुलाई आफ्नै निवास बूढानीलकण्ठ बोलाएर नयाँ सरकार निर्माणमा सहयोग गर्न आग्रह गरेका थिए।
देउवाको प्रस्तावमा माओवादीले समर्थन जनाए पनि जसपाले भने केहीदिनको समय दिन आग्रह गरेका थिए।
नयाँ सत्ता समीकरणको लागि कांग्रेसलाई साथ दिने कि प्रधानमन्त्री केपी शर्मा ओलीलाई साथ दिएर जाने भन्ने विषयमा जसपामा दुई धार छ।
अध्यक्ष महन्थ ठाकुर, राजेन्द्र महतो र लक्ष्मणलाल कर्ण ओलीसँग मिलेर आफ्ना माग सम्बोधन गर्नुपर्ने पक्षमा छन् भने अध्यक्ष उपेन्द्र यादव, संघीय परिषद् अध्यक्ष डा. बाबुराम भट्टराई नयाँ सत्ता समीकरण बनाएर ओलीलाई प्रधानमन्त्रीबाट हटाउनुपर्छ भन्ने पक्षमा छन्।
सोही कारण पार्टीभित्र ओलीको बहिर्गमन र नयाँ सरकार निर्माणमा कुन पक्षलाई साथ दिएर जाने भन्नजे विषयमा शुक्रबार पनि जसपाका ६ जना नेता महाराजगञ्जमा रहेको एक नेताको घरमा छलफलमा बसेका थिए।
सो छलफलमा ओलीको बहिर्गमन नै पहिलो एजेण्डा बनाएर जानुपर्ने कुरामा ६ नेताहरुबीचमा सैद्धान्तिक सहमति जुटेको बताइएको थियो।
आजको बैठकले त्यसबारे एउटा निर्णय गरेर जाने सम्भावना रहेको बताइन्छ।
प्रतिक्रिया