युनिकोड
प्रधानमन्त्री तथा पार्टी अध्यक्ष केपी शर्मा ओलीसँग चार घण्टा छलफल गरेलगत्तै नेपाल कम्युनिस्ट पार्टीका अर्का अध्यक्ष पुष्पकमल दाहाल प्रचण्डसहितका नेताहरु छुट्टै छलफलमा जुटेका छन्।
काठमाडौंको थापागाउँमा अध्यक्ष प्रचण्ड, वरिष्ठ नेता झलनाथ खनाल, माधवकुमार नेपाल र प्रवक्ता नारायणकाजी श्रेष्ठले प्रदेश ५ का केन्द्रीय सदस्यहरुलाई पार्टीमा भइरहेको पछिल्लो गतिविधिबारे जानकारी गराइरहेको स्रोतले बतायो।
प्रधानमन्त्री ओलीसँगको भेट सकारात्मक रहेको र भोलि शुक्रबार फेरि बसेर छलफल गर्ने सहमति गरेलगत्तै प्रचण्ड, खनाल, नेपाल र श्रेष्ठ थापागाउँ पुगेका हुन्।
यसअघि बुधबार गण्डकी प्रदेशका केन्द्रीय सदस्यहरुलाई प्रशिक्षणात्मक ‘ब्रिफिङ’ गरेका प्रचण्ड–नेपाल समूहले साउन २१ गते पनि तिनै नेताहरुले पत्रकारलाई पार्टीभित्र देखिएको विवादबारे जानकारी गराएका थिए।
स्रोतका अनुसार प्रचण्डले प्रधानमन्त्री ओलीसँग भोलि शुक्रबार आज भएको भेटबारे समेत ‘ब्रिफिङ’ गर्नेछन्।
प्रतिक्रिया