नयाँ दिल्लीमा बिम्स्टेक सुरक्षा बैठक, बंगलादेशले राख्यो सार्क ब्युँताउने प्रस्ताव

भारतले नयाँ दिल्लीमा बिम्स्टेक राष्ट्रका सुरक्षा सल्लाहकारहरूको पाँचौँ बैठक आयोजना गरेको छ। बिहीबार भारतीय राष्ट्रिय सुरक्षा सल्लाहकार अजित डोभलले आयोजना गरेको बैठकमा आतंकवाद, संगठित र उदाउँदा सुरक्षा खतराका सम्बन्धमा सहकार्य सुदृढ गर्ने सहमति भएको छ।

बैठकमा नेपालबाट गृहसचिव राजकुमार श्रेष्ठ सहभागी थिए।

डोभलले अहिले विश्वमा भूराजनीतिक द्वन्द्व, प्रविधिको तीव्र विकास र आपूर्ति शृंखलामा आएको अवरोधले मुलुकहरूबीच सघन सहकार्य गर्नुपर्ने अवस्था सिर्जना भएको बताएका थिए। बिम्स्टेक मुलुकहरूले आपसी हितका लागि संवाद र निर्णायक कदम चाल्नुपर्ने उनको भनाइ थियो।

आतंकवाद र अन्तर्राष्ट्रिय संगठित अपराधसँग जुध्न व्यावहारिक सहकार्य गर्ने सहमति बिम्स्टेक मुलुकहरूबीच भएको छ। त्यस्तै, साइबर, समुद्री सुरक्षा र ऊर्जा क्षेत्रको सुरक्षालाई सुदृढ गर्ने सहमति पनि बैठकले गरेको छ।

बैठकमा बंगलादेशले सार्क ब्युँताउनुपर्ने बताएको थियो। सार्क र बिम्स्टेकलाई एकअर्काको प्रतिद्वन्द्वी मान्न नहुने बंगलादेशको तर्क थियो।