कोरोना (कोभिड–१९) संक्रमणको जोखिमबीच आज (शुक्रबार) अपराह्न ४ बजेदेखि संसदको बजेट अधिवेशन सुरु हुँदै छ।
विश्वव्यापी रुपमा फैलिएको उक्त भाइरसको जोखिम रहेकै बेला संघीय संसदको बजेट अधिवेशन सुरु हुनलागेको हुँदा संसदको दुवै सदन (प्रतिनिधिसभा र राष्ट्रियसभा)मा सांसदहरुबीच दूरी कायम गर्नेलगायतका विशेष व्यवस्था गरिएको छ।
सांसदहरु बस्ने कुर्सीहरुबीच अन्तर राख्ने, मास्क अनिवार्य लगाउनुपर्ने, संसद् भवन प्रवेश गर्नुअघि ज्वरो नाप्ने, साबुनपानीले हात धुने, बोल्ने बेला माइकलाई स्यानिटाइज गर्ने लगायतका उपाय अपनाइएको छ।
सभामुख अग्निप्रसाद सापकोटाले बैठक सञ्चालनमा उच्च सतर्कता अपनाइएको बताए। उनले बैठक कक्षभित्र विश्व स्वास्थ्य संगठनले तय गरेको मापदण्ड, सरकारको निर्णय र स्वास्थ्यटोलीले तय गरेका अन्य विभिन्न मापदण्डअनुसार बैठक सञ्चालन गरिने बताए।
सभामुखका अनुसार सांसदहरु बस्ने कुर्सीको दायाँ–बायाँ एक मिटर ५० सेन्टिमिटर दूरी कायम गरिएको र अगाडि–पछाडि १ मिटर ३० सेन्टिमिटर कायम गरिएको छ।
सो बैठक सञ्चालन गर्नुअघि सबै सांसदको कोरोना परीक्षण गरिएको छ। परीक्षण गरिएका सांसदलगायत कर्मचारीमध्ये ४४१ को रिपोर्ट आइसकेको छ भने उनीहरु कसैमा पनि कोरोना देखिएको छैन।
सबै तस्बिरः प्रविन कोइराला
प्रतिक्रिया