युनिकोड
नेकपा एमाले अछामका नेता भैरवबहादुर बोहरा नेपाली कम्युनिस्ट पार्टीमा प्रवेश गरेका छन्। सोमबार उनले नेपाली कम्युनस्ट पार्टीका नेता भीम रावलसँग भेट गर्दै एमाले त्यागेर नेपाली कम्युनिस्ट पार्टी प्रवेश गरेको घोषणा गरेका हुन्।
बोहोराले एमालेको नेतृत्व सत्ता केन्द्रित, अहंकारी र स्वेच्छाचारी भएको भन्दै एमाले त्याग्नुपरेको उल्लेख गरेका छन्। ‘अहिले आएर राष्ट्रिय स्वाधीनता नै खतरामा पर्न लागेको र जनताका आकांक्षा नै धुमिल हुनलागेको जस्तो स्थिति सिर्जना भएको देख्दा देशभक्तिमा आधारित देश र जनमुखी बलियो कम्युनिस्ट पार्टीको आवश्यकता महसुस भएको छ,’ उनले भनेका छन्, ‘यस्तो आवश्यकतालाई पूरा गर्नेतर्फ काम गर्नुभन्दा म रहेको नेकपा (एमाले) को नेतृत्व सत्ता केन्द्रित, अहंकारी र स्वेच्छाचारी भएर विपरीत सिद्धान्त र व्यवहार भएकाहरुसंग साँठगाँठ गर्नेतर्फ लागेको देखियो।’
बोहोराले आफू सम्पर्क समन्वय कमिटीको केन्द्रीय सदस्य र अछाम इञ्चार्जको पद तथा एमालेको सदस्यता परित्याग गरेको बताएका छन्।
तर, एमाले उपमहासचिव लेखराज भट्टले भने उनी एमोको अछाम इन्चाज र केन्द्रीय सदस्य दुवै नभएको नेपालखबरलाई बताए। ‘अछामको जिल्ला इन्चार्ज झपट बोहोरा हो,’ भट्टले भने, ‘उहाँ पार्टीको केन्द्रीय सदस्य पनि होइन।’
प्रतिक्रिया