धरौटीमा रिहा भएका रविले आज चितवनमा ‘विशेष सम्बोधन’ गर्दै

धरौटीमा रिहा भएपछि राष्ट्रिय स्वतन्त्र पार्टी (रास्वपा) का सभापति रवि लामिछानेले आज (शनिबार) पहिलोपटक राजनीतिक सम्बोधन गर्ने भएका छन्।

रास्वपा प्रवक्ता मनीष झाले दिएको जानकारीअनुसार पूर्वगृहमन्त्रीसमेत रहेका लामिछानेले आज बिहान ११ बजे चितवनको भतरपुरस्थित चौबीसकोटी भन्ने स्थानमा सम्बोधन गर्ने भएका हुन्। 

झाले भनेका छन्, ‘सभापति रवि लामिछानेज्यूको विशेष साथै छोटो सम्बोधनको कार्यक्रम छ।’

यसपछि लामिछाने दिउँसो १:५० को बुद्ध एयरको विमानबाट काठमाडौँ आउने जानकारी पनि प्रवक्ता झाले दिएका छन्। 

उनले भनेका छन्, ‘आजै काठमाडौँ आएर जेनजी आन्दोलनका सहिदका परिवार तथा घाइतेहरूलाई भेट्न सुरुवात गर्ने कार्यक्रम पनि छ।’

यसैगरी आइतबार दिउँसो ३ बजे सभापति लामिछानेलाई वनस्थलीस्थित पार्टी केन्द्रीय कार्यालय घण्टीघरमा स्वागत गर्ने कार्यक्रम रहेको प्रवक्ता झाले बताए।

सुप्रिम सहकारी ठगी मुद्दामा पुर्पक्षका लागि ललितपुरस्थित नक्खु कारागारमा रहेका लामिछाने उच्च अदालत, तुलसीपुरको बुटवल इजलासले बिहीबार दिएको आदेशअनुसार शुक्रबार जिल्ला अदालत रुपन्देहीमा पौने ४ करोड धरौटी बुझाएर रिहा भएका हुन्।