युनिकोड
नेपाली कांग्रेसको पार्टी पदाधिकारी तथा पूर्वपदाधिकारी बैठक पार्टी केन्द्रीय कार्यालय सानेपामै बस्ने भएको छ। पार्टी प्रचार विभाग प्रमुख मीनबहादुर विश्वकर्माले बैठक पार्टी कार्यालयमै बस्ने तय भएको जानकारी दिए।
‘आज पदाधिकारी तथा पूर्वपदाधिकारी बैठक दिउँसो १ बजे बस्दैछ। बैठक पार्टी कार्यालयमै बस्ने तय भएको छ’ उनले नेपालखबरसँग भने।
यसअघि बुधबार सभापति शेरबहादुर देउवाले आजका लागि बैठक आह्वान गरेका थिए। बैठक कहाँ बस्ने भन्ने सार्वजनिक भएको थिएन्। कांग्रेस नेताहरुका अनुसार आजको बैठक हिमालयन होटल ललितपुरमा बस्ने तय भएको थियो।
‘सुरक्षा र स्वास्थ्य अवस्थालाई ख्याल गर्दै सभापति बैठकमा सहभागी नहुने भन्ने कुरा आयो। त्यसपछि कोषाध्यक्षको निवास मा बस्ने कि भन्ने पनि कुरा भएको थियो,’ कांग्रेसका एक पदाधकारीले नेपालखबरसँग भने, ‘त्यहाँ पनि सुरक्षालाई ध्यान दिँदै पार्टी कार्यालयमै बैठक बस्ने भनिएको छ।’
कांग्रेस केन्द्रीय कार्यालय पनि भदौ २४ गतेको जेनजी आन्दोलनबाट क्षतिग्रस्त भने छ।
देउवा आफैँले बोलाएको बैठकमा पनि सहभागी नहुने भएपछि आजको बैठकको अध्यक्षता उपसभापति पूर्णबहादुर खड्काले गर्नेछन्।
‘सभापति बिरामी बिरामी नै हुनुहुन्छ। कांग्रेस केन्द्रीय कार्यालयका मुख्यसचिव कृष्णप्रसाद पौडेलले नेपालखबरसँग भने।
जेनजी आन्दोलनपछि कांग्रेसभित्र नेतृत्व हस्तान्तरणको आवाज उठिरहेको छ।
आजको पदाधिकारी बैठकले असोज २६ का लागि तय केन्द्रीय समिति बैठकका एजेन्डा, महाधिवेशन, निर्वाचनलगायतबारे छलफल गर्नेछ।
प्रतिक्रिया