युनिकोड
नेपाली कांग्रेसका सांसद नारायणप्रकाश साउदले भारतको उर्जा मागलाई ध्यानमा राखी नेपालले विद्युत निर्यात रणनीति बनाउनुपर्ने बताएका छन्।
शुक्रबार काठमाडौंमा राष्ट्रिय स्वतन्त्र पार्टीले आयोजना गरेको नीति संवाद कार्यक्रममा बोल्दै उनले यस्तो बताएका हुन्। भारतलाई बाइपास गरेर तेस्रो मुलुकमा विद्युत निर्यात गर्ने अवस्था नरहेको उनको भनाइ छ।
उनले भौगोलिक चुनौतीका कारण भारतलाई बाइपास गरेर तेस्रो मुलुकमा विद्युत निर्यात गर्न सम्भव नभएको प्रष्ट पारे। उनले नेपालको जलस्रोतको अधिकतम मूल्य प्राप्तिका लागि अनुसन्धान र विश्लेषण अपरिहार्य भएको पनि बताए।
नेपालको आफ्नै नीति र भौगोलिक समस्याको कारण विगतमा जलस्रोतको न्युनतम उपयोग गर्न पनि नसकेको टिप्पणी गरे।
उनले भने, ‘भारतलाई बाईपास गरेर तेस्रो मुलुकमा विद्युत निर्यात गर्ने अवस्था पनि छैन। ट्रान्समिसन लाइन भएपनि भारतले नै दिनुपर्छ। त्यस्तो अवस्थामा भारतमा उर्जाको माग कस्तो भन्ने विषयमा एउटा उपयुक्त रणनीति बनाएर हामीले अगाडि बढ्नुपर्ने आवश्यकता छ।’
सांसद साउदले निजी क्षेत्रसँग सहकार्य गरेर जलस्रोतको अधिकतम उपयोग गरेर मुलुकलाई समृद्ध बनाउने दिशामा अघि बढ्न जरुरी रहेको बताए।
प्रतिक्रिया