ओली-भण्डारी छलफलबारे राजेन्द्र गौतमले भने: खुलेर कुरा गर्नु भएको छ

नेकपा एमालेका प्रचार विभाग प्रमुख राजेन्द्र गौतमले प्रधानमन्त्री एवं नेकपा एमालेका अध्यक्ष केपी शर्मा ओली र पूर्वराष्ट्रपति विद्या भण्डारीबीच खुलेर कुरा भएको बताएका छन्। 

ओली र भण्डारीबीच पार्टी केन्द्रीय कार्यालय च्यासलमा भएको  छलफलबारे जानकारी दिँदै उनले छलफल सकारात्मक ढंगले अघि बढेको र अब पार्टीमा हुने गतिविधिहरु सहमति र छलफलबाटै अघि बढाउने निष्कर्ष निकालिएको उल्लेख गरे।
 
‘छलफल सकारात्मक ढंगले अघि बढेको छ, राजनीतिले नै सम्बन्धलाई टुंगो गर्दछ,’ गौतमले भने, ‘सम्बन्धले राजनीतिको टुंगो गर्दैन। आज राजनीतिक मुद्दाहरुमा, दृष्टिकोणमा समानता हुने परिस्थिति निर्माण भइसकेपछि राजनीतिले नै सम्बन्धलाई सुदृढ बनाएर लैजान्छ भनेझैँ आज खुलेर पार्टीको आन्तरिक जीवन, विधान महाधिवेशन, त्यसको तयारीका सन्दर्भमा र अहिलेका राष्ट्रिय राजनीतिका विकसित घटनाक्रमका बारेमा दुवै नेताहरुको बीचमा खुलेर एकले अर्कालाई लागेका कुरा राख्नुभएको छ। अब कुनैपनि हालतमा एकले अर्कालाई विभाजन गरेर अघि जानसक्ने परिस्थिति बन्दैन। हामी जे गर्छौं सहमति र छलफलबाट नै टुंग्याउँछौँ भन्नुभएको छ।’

प्रचार विभाग प्रमुख गौतमले एकले अर्कोलाई निषेध गरेर अघि बढ्ने स्थिति नरहेको निष्कर्ष निस्किएको बताउनु बताए।