प्रधानमन्त्री एवं नेकपा एमाले अध्यक्ष केपी शर्मा ओलीले पूर्वराष्ट्रपति विद्या भण्डारी राजनीतिमा आउने कुरा पार्टीले नठानेको बताएका छन्।
वरिष्ठ पत्रकार विजयकुमार पाण्डेसँग दिशा निर्देश अनलाइन टिभीसँगको कुराकानीमा भण्डारीलाई नेतृत्व हस्तान्तरण गर्न नसकिने समेत उल्लेख गरे।
राजनीतिमा आउनेबारे आफू र पार्टीसँग कुनै सल्लाह पनि पूर्वराष्ट्रपति भण्डारीले नगरेको उनको भनाइ छ। ‘यसमा उहाँले अरुसँग थाहा भएन, मसँग सरसल्लाह गर्नुभएन,’ ओलीले भने, ‘र पार्टीमा आधिकारिक ढंगले सरसल्लाह गर्नुभएन।’
यद्यपि सार्वजनिकरुपमा यसबारे बोलेको भने आफूहरुलाई थाहा भएको उनले जिकिर गरे। ‘हामीले पनि जानकारी प्राप्त गरेका छौँ,’ ओलीले भने, ‘उहाँले सार्वजनिकरुपमा बोलेका कुराहरू, उहाँले आउँछु भनेका कुराहरू,ती के हुन्? उहाँसँग हामीले सोध्नुपर्छ।’
यस विषयमा पार्टीले कहिले निर्णय गर्छ भन्ने प्रश्नमा उनले पूर्वराष्ट्रपति सक्रिय राजनीतिमा आउनु हुन्छ या हुँदैन भन्नेबारे पार्टीले भण्डारीलाई छिट्टै सुझाव दिने जानकारी समेत दिए।
उनले थपे, ‘यी सबै विषयमा सोचेर उहाँलाई दिने सुझाव अथवा उहाँमाथि गर्नुपर्ने निर्णय पार्टीले गर्न त गर्छ नै।’
Shares

प्रतिक्रिया