एमाले निकट मुक्ति समाजका ११ जना केन्द्रीय सदस्यले दिए सामूहिक राजीनामा

सत्तारुढ नेकपा एमालेको भातृ संगठन मुक्ति समाजका सुदूरपश्चिम क्षेत्रका ११ जना केन्द्रीय सदस्यको सामूहिक राजीनामा दिएका छन्।

उनीहरुले नेतृत्वप्रति असहमति जनाउँदै सामूहिक राजीनामा दिएको जनाएका छन्।

राजीनामा दिनेमा एमालेको प्रदेश कमिटी सदस्यसमेत रहेका लक्ष्मी बिक, सत्यराज स्नेही, बलभद्र दयाल र लालबहादुर बिक छन्।

त्यसैगरी सुन्दर जैरु, प्रेम भूल, हंश नेपाली, सुशिला मिजार, कलावती लावड, रमेश तिरुवा र दिनेश नेपालीले पनि राजीनामा दिएका हुन्। उनीहरु एमाले विभिन्न जिल्ला कमिटी सदस्य थिए।

उनीहरुले सुदूरपश्चिममा पार्टीका ४ जना प्रदेश कमिटी सदस्य उपस्थित हुँदाहुँदै कञ्चनपुर जिल्ला कमिटि सदस्य रहेका भारमल सुनारलाई प्रदेश इन्चार्ज बनाएको प्रति आपत्ति जनाउँदै राजीनामा दिएका हुन्।

‘संगठन सुदृढ बनाउने सन्दर्भमा गरिएको प्रारम्भिक सहमतिलाई बेवास्ता गर्दै कार्य विभाजनमा कुनै सल्लाह र समन्वय नगरी एकपक्षीय निर्णय गरिएको छ। यो निर्णयका लागि न त प्रदेश नेतृत्वसँग समन्वय गरियो, न त अग्रज नेतासँग छलफल गरियो,’ उनीहरुको राजीनामा पत्रमा उल्लेख छ।