युनिकोड
नेकपा एकीकृत समाजवादीका अध्यक्ष माधव कुमार नेपाल यतिबेला भारतको नयाँ दिल्लीमा छन्। उनी शुक्रबार बेलुकी त्रिभुवन अन्तर्राष्ट्रिय विमानस्थल हुँदै नयाँ दिल्ली गएका हुन्।
भारतीय कम्युनिस्ट नेता सीताराम येचुरीको अन्तिम संस्कारमा सहभागी हुन उनी नयाँ दिल्ली गएको पार्टीका एक पदाधिकारीले जानकारी दिए।
‘शुक्रबार बेलुकी नै जानुभएको हो,’ ती पदाधिकारीले भने, ‘अन्तिम संस्कारमा सहभागी भएर एक दुई दिनभित्रै फर्कने कुरा छ।’
पूर्वप्रधानमन्त्री समेत रहेका नेपालको अन्य भेटघाटका कार्यक्रम भने तय नभएको ती पदाधिकारीले बताए।
दिल्लीको अल इन्डिया इन्स्टिच्युट अफ मेडिकल साइन्सेस (एम्स) मा श्वासप्रश्वास नलीको संक्रमणको उपचार गराइरहेका यचुरीको बिहीबार निधन भएको थियो।
उनको शरिर अन्तिम संस्कारका लागि पार्टी मुख्यालयमा राखिएको छ।
यचुरीको अन्तिम संस्कारमा सहभागी हुन नेकपा एमालेले वरिष्ठ उपाध्यक्ष ईश्वर पोखरेललाई पठाउने निर्णय पार्टी बैठकबाटै गरेको थियो।
येचुरी अगस्ट २९ सम्म सामाजिक सञ्जालमा सक्रिय थिए।
येचुरी सन् १९९२ देखि सीपीएमको पोलिटब्यूरोको सदस्य थिए। यसअघि, उनी सन् २००५ देखि २०१७ सम्म पश्चिम बंगालबाट राज्यसभाको सांसद थिए।
प्रतिक्रिया