अमेरिकी एड्मिरलको टोलीले भेट्यो प्रधानमन्त्री प्रचण्डलाई

प्रधानमन्त्री पुष्पकमल दाहाल ‘प्रचण्ड’ सँग अमेरिकाको एसिया प्रशान्त क्षेत्र कमान्डका एड्मिरल जोहन एक्विलिनोले शिष्टाचार भेट गरेका छन्।

सिंहदरबारमा आइतबार अपराह्न भएको भेटमा उनीहरूबीच द्विपक्षीय सम्बन्धका विविध विषयमा छलफल भएको छ।

प्रधानमन्त्री प्रचण्डले नेपाल–अमेरिकाको द्विपक्षीय सम्बन्धमा नेपालले महत्त्व दिँदै आएको बताए। उनले नेपालको आर्थिक विकास र समुन्नतिमा अमेरिकाको महत्त्वपूर्ण सहयोग रहेको उल्लेख गरे।

त्यस अवसरमा एड्मिरल एक्विलिनोले विश्व शान्ति स्थापनाका लागि संयुक्त राष्ट्रसङ्घ नेतृत्त्वको शान्ति मिसनमा नेपालले सबैभन्दा ठूलो सङ्ख्यामा योगदान गरेकोमा बधाई दिए। उनले विश्व शान्ति स्थापनामा नेपालले खेलेको भूमिकाको प्रशांसा गरे।

एड्मिरल एक्विलिनो यही फागुन ८ देखि सुरु भएको ‘अभ्यास शान्ति प्रसास–४’ अवलोकनका लागि नेपाल आएका हुन्।