युनिकोड
प्रमुख प्रतिपक्षी नेकपा एमालेले संसदीय दलको बैठक नयाँबानेश्वरमा सुरु भएको छ।
प्रमुख सचेतक पदम गिरीका अनुसार संसद् भवन नयाँबानेश्वरस्थित ल्होत्से हलमा संसदीय दलको बैठक सुरु भएको हो।
उक्त बैठकबाट एमालेले आफ्नो सम्भावित रणनीति तय गर्ने भएको छ। बैठकबाट एमालेले उपप्रधान तथा गृहमन्त्री नारायणकाजी श्रेष्ठको राजीनामा माग्दै संसद्मा प्रस्तुत हुने रणनीति बनाउने बताइएको छ।
गत बुधबार त्रिभुवन विमानस्थलबाट बरामद गरिएको १०० केजी सुन प्रकरणमा सरकारले प्रतिपक्षी दलहरुलाई आक्षेप लगाएको भन्दै एमाले रुष्ट छ।
यही प्रकरणमा एमालेले सरकारसँग पनि धारणा माग्ने भएको छ। कम्बोडिया भ्रमणबाट फर्किने क्रममा सोमबार राति एमाले अध्यक्ष केपी शर्मा ओलीले गृहमन्त्री श्रेष्ठको चर्को आलोचना गरेका थिए।
उनले गृहमन्त्रीको गैरजिम्मेवारीपनले हद नाघेको भन्दै आक्रोश पोखेका थिए।
सुन प्रकरणमा केही सञ्चारमाध्यमहरुले व्यवसायी दीपक मल्होत्रा र एमाले अध्यक्ष ओलीलाई जोड्दै आएका छन्।
प्रतिक्रिया