प्रतिनिधिसभाका उपसभामुखको उम्मेदवारबारे छलफल गर्न नेपाली कांग्रेस संसदीय दल कार्यसमितिको बैठक बसिरहेको छ।
सभापति तथा संसदीय दलका नेता शेरबहादुर देउवाको निवास धुम्बाराहीमा जारी बैठकमा उपसभामुखको उम्मेदवारबारे छलफल भइरहेको छ।
बैठकमा दलका नेता देउवा, महामन्त्रीद्वय विश्वप्रकाश शर्मा र गगन थापा, मुख्य सचेतक रमेश लेखक, राष्ट्रियसभा संसदीय दलका नेता रमेशजंग रायमाझी र राष्ट्रियसभा सचेतक अनिता देवकोटा सहभागी छन्।
सत्ता गठबन्धनका तर्फबाट राष्ट्रिय स्वतन्त्र पार्टी (रास्वपा) ले इन्दिरा राना मगरलाई उपसभामुखको उम्मेदवार बनाउने निर्णय गरिसकेको छ। सिंहदरबारस्थित पार्टी संसदीय दलको कार्यालयमा शुक्रबार बसेको बैठकले राना मगरलाई उम्मेदवार बनाउने निर्णय गरेको हो।
संसद सचिवालयका अनुसार शुक्रबार उपसभामुखका लागि मनोनयन दर्ता गराउने कार्यसूची छ।
बिहीबार भएको निर्वाचनमा सभामुखमा नेकपा एमालेका तर्फबाट प्रतिनिधिसभा सदस्य रहेका देवराज घिमिरे निर्वाचित भइसकेका छन्।
Shares
प्रतिक्रिया