प्रतिनिधिसभामा जान मुख्यन्यायधिवक्ता छाडेका झाले पाए प्रदेशको टिकट

जसपाले महोत्तरी ३ मा हरिनारायणलाई दियो टिकट

महोत्तरी निर्वाचन क्षेत्र नम्बर ३बाट प्रतिनिधिसभामा लड्नका लागि मधेश प्रदेशको मुख्यन्यायधिवक्ताबाट राजीनामा दिएका दीपेन्द्र झाले प्रदेशसभाको टिकट पाएका छन्।

जनता समाजवादी पार्टी (जसपा)बाट महोत्तरी क्षेत्र नम्बर ३ मा झा र पूर्वमन्त्री हरिनारायण यादवले आकांक्षा देखाएका थिए। यस्तोमा प्रतिनिधिसभाको टिकट यादवले पाएका छन्।

नेपाली कांग्रेसमा रहेर लामो राजनीति गरेका पूर्वमन्त्री यादव २०६२/०६३ सालमा भएको पहिलो मधेश आन्दोलनको समयमा तत्कालीन मधेशी जनअधिकार फोरम नेपालमा प्रवेश गरेका थिए।

महोत्तरी ३ मा एमालेबाट रामदयाल मण्डलसमेत चुनाव लड्ने तयारी गरेका थिए। यद्यपि एमाले र जसपाबीच गठबन्धन भएपछि त्यो क्षेत्रमा जसपाका उम्मेदवार यादवलाई सघाउनु पर्ने भएको छ।

मधेश प्रदेशको मुख्यन्यायधिवक्ता पदबाट राजीनामा दिएका झालाई भने जसपाले प्रदेशमा व्यवस्थापन गरेको छ।