युनिकोड
काठमाडौँ र ललितपुर महानगरपालिकाले उपत्यकाका सबैनगरपालिकाको साझा समस्यालाई सम्बोधन गर्ने गरी आगामी वर्षको नीति, कार्यक्रम र बजेट निर्माणको आन्तरिक तयारी गरिरहेका छन्।
कोरोना भाइरस रोग (कोभिड–१९) बाट सिर्जित समस्याको समाधान गर्दै उत्पादन र रोजगारमूलक कार्यमा केन्द्रित हुने गरी दुवै महानगरपालिका आगामी वर्षको नीति, कार्यक्रम र बजेट निर्माणको आन्तरिक तयारीमा जुटेका खबर आजको गोरखापत्र दैनिकमा नगेन्द्र सापकोटाले लेखेका छन्।
खेतीयोग्य जमिनको सदुपयोग गर्न र क्वारेन्टाइनको व्यवस्थापनका लागि काठमाडौँ, ललितपुर र भक्तपुरका १८ वटै पालिकालाई एउटै एकाइ मान्दै ती क्षेत्रका खेतीयोग्य जमिन बाँझो नराख्ने नीति निर्माणको आन्तरिक तयारीमा जुटेको दुवै महानगरपालिकाले जनाएका छन्।
काठमाडौँ, ललितपुर र भक्तपुर जिल्लामा दुईवटा महानगर र १६ वटा नगरपालिका रहेका छन् । काठमाडौँ र ललितपुर महानगरबाहिर ठूलो मात्रामा खेतीयोग्य जमिन बाँझो रहेकाले ती क्षेत्रका बाँझो जमिनलाई अनिवार्य रूपमा सदुपयोग गर्ने र त्यसका लागि सबै पालिकाले साझा कोष निर्माण गर्ने गरी दुवै महानगरले आगामी वर्षको बजेट निर्माण गर्ने गृहकार्य गरिरहेको छ।
ललितपुर महानगरपालिका प्रमुख चिरिबाबु महर्जनले कोरोना भाइरसबाट सिर्जित समस्याको समाधान गर्ने र उपत्यकामा ठूलो सङ्ख्यामा रोजगारी सिर्जना गर्ने गरी ललितपुर महानगरपालिका मात्र नभई सबै पालिकाले साझा धारणा बनाउनुपर्ने बताए।
उपत्यकामा खेतीयोग्य जमिन कृषि कार्यमा मात्र प्रयोग गर्ने र खेती नहुने ठाउँमा पशुपालन गर्ने कार्यका लागि सबै पालिकाले साझा कोष खडा गरी लगानी गर्ने, उत्पादित वस्तुलाई निश्चित निकायले खरिद गरी बिक्री वितरणको व्यवस्था गर्ने नीति बनाउन आन्तरिक तयारी भइरहेको बताइएको छ।
प्रतिक्रिया