युनिकोड
यही असोज १ गते विश्वकर्मा पूजाका क्रममा भएको एउटा विवादले ठूलो रूप लिँदा सिराहाको कल्याणपुर नगरपालिका–८ स्थित अरङ गाउँको ठूलोपोखरी डिलका पाँच दलित परिवार समस्यामा परेका छन्।
विश्वकर्मा पूजामा गाउँमा आर्केस्ट्रा ल्याइएको थियो। आर्केस्ट्रामा नाचगान गर्ने क्रममा भएको सामान्य विवादपछि दलित परिवारका घरमा तोडफोड तथा लुटपाट भएको छ।
पीडितका अनुसार नाचगानका क्रममा केहीले रक्सी खाएका थिए। यसै क्रममा केही दलित युवा र स्थानीय प्रभाषसिंह राजपुतबीच भनाभन भयो। सुरुमा सामान्य लागेको विवाद यत्तिकै सुल्झिएन। दलित परिवारमा बस्तीबाट उठाइदिने धम्कीसमेत आयो।
यसपछि दलित परिवार सुरक्षा माग गर्दै इलाका प्रहरी कार्यालय, कल्याणपुर पुगे। प्रहरीले विवाद समाधान गर्न यही असोज १२ मा छलफल राख्यो। तर त्यस दिन छलफल नभएपछि अर्को छलफल असोज २१ गतेका लागि तोकियो। तर छलफल हुनुअघि अर्थात् असोज १७ गते शुक्रबार दिउँसो करिब २ बजेतिर २०/२५ जनाको समूहले दलित बस्ती तहसनहस पार्यो।
उक्त समूहले पाँचवटा दलितका घरमा तोडफोड र लुटपाट गरेको पीडित सोभित पासमानले बताए।
‘तोडफोड र लुटपाटको समयमा इलाका प्रहरी कार्यालय कल्याणपुरका केही प्रहरी घटनास्थलमै थिए, तर कसैले केही बोलेन। उनीहरूले रोक्ने प्रयास पनि गरेनन्, यसले हामीलाई थप भयभीत बनायो’, उनले भने।
पीडितहरूका अनुसार, अशोक पासमानको घरबाट चारआना सुन र ३० तोला चाँदीका गहना, राजकुमार पासमानको घरबाट खाद्यान्न, रासलाल पासमानको घरबाट खाद्यान्नका साथै चार आना सुन, १० तोला चाँदीका गहना र रु १८ हजार र बिन्दे पासमानको घरबाट २० तोला चाँदी, दुई आना सुन र रु तीन हजार लुटिएको छ।
त्यस्तै खाना पकाउने भाँडा, लत्ताकपडादेखि बगैँचाबाट आँप, अम्बा, केरा र कागतीका बोटमा पनि क्षति गरिएको छ। पीडित राजकुमार पासमानका अनुसार पाँचवटा परिवारका ३० जना अहिले अलपत्र परेका छन्।
घटनाको भोलिपल्ट प्रमुख जिल्ला अधिकारी वसन्त अधिकारी र जिल्ला प्रहरी कार्यालय सिराहाका प्रमुख तथा प्रहरी उपरीक्षक अनन्तराम शर्मा बस्तीमा पुगे। उनीहरूले स्थलगत अनुगमनपछि पीडित परिवारलाई त्रिपाल, कम्बल र झुल वितरण गरे।
१३ जनाविरुद्ध जाहेरी
बस्तीमा तोडफोड र लुटपाट प्रकरणमा वडाध्यक्ष रामकिशोर यादवसहित १३ जनाविरुद्ध किटानी जाहेरी परेको छ। पीडितहरूले इलाका प्रहरी कार्यालय मिर्चैयामा सोमबार आपराधिक उपद्रवसम्बन्धी जाहेरी दिएका हुन्।
उनीहरूले वडाध्यक्ष यादव, प्रभास सिंह, कलास सिंह, रामनारायण सिंह, मुस्तफा राइन, गणेश कामतीलगायतका व्यक्तिविरुद्ध तोडफोड, लुटपाट र दुरुत्साहनको आरोप लगाएका छन्।
वडाध्यक्षसहित तीन जना पक्राउ
प्रहरीले वडाध्यक्ष यादवलाई भिडलाई उक्साएको आरोपमा नियन्त्रणमा लिएको छ। यादवलाई गत शनिबार नै इलाका प्रहरी कार्यालय, मिर्चैयाबाट पक्राउ गरी हिरासतमा राखिएको हो।
इलाका प्रहरी कार्यालय मिर्चैयाका प्रमुख प्रहरी नायब उपरीक्षक राजेशराज पुरीले जाहेरीमा समेत नाम उल्लेख रहेका वडाध्यक्ष यादवसहित कामती र कलासलाई पक्राउ गरिसकेको र अन्यको खोजी भइरहेको जानकारी दिए।
पीडित परिवारलाई नगरपालिकाको राहत
पीडित परिवारलाई नगरपालिकाले सोमबार राहत सामग्री प्रदान गरेको छ। नगरपालिकाका प्रमुख प्रशासकीय अधिकृत श्रीदेव यादवका अनुसार, प्रतिपरिवार २५ किलो चामल, पाँच किलोका दरले दाल, चिउरा, मुरही, सोयाबिन, आलु, प्याज, आटालगायतका सामग्री उपलब्ध गराइएको छ।
पीडित परिवारको आवासका लागि समेत पहल भइरहेको जानकारी दिँदै कार्यवाहक नगर प्रमुख रेखादेवी यादवले भनिन्, ‘उहाँहरूलाई तत्कालका लागि राहत दिएका छौँ, आवासको व्यवस्थापनबारे नगरपालिकामा छलफल भइरहेको छ।’ रासस
प्रतिक्रिया