नेपाल कम्युनिस्ट पार्टी एकीकृत समाजवादीका पाल्पा जिल्ला अध्यक्ष खिमानन्द पाण्डेय (कमल) को मृत्यु भएको छ।
बगनासकाली गाउँपालिका–१ पिप्लेस्थित घरबाट उपचारका लागि लुम्बिनी मेडिकल कलेज प्रभास लैजाने क्रममा बाटोमै उनको मृत्यु भएको हो।
शुक्रबार साँझ ६ः१५ बजे हृदयाघात भई ५२ वर्षीय पाण्डेयको उपचारका लागि लुम्बिनी मेडिकल कलेज लगिएकामा ६ः४५ बजे अस्पतालले मृत्यु घोषणा गरेको पारिवारिक स्रोतले जनाएको छ।
मृतक पाण्डेयका दुई छोरा र श्रीमती छन्। पाण्डेयको २६ वर्षीय माहिलो छोराको पनि गत वर्ष हृदयाघातबाटै मृत्यु भएको थियो। पूर्वएमाले पाल्पाको उपसचिव मृतक पाण्डेय पाल्पामा सरल र स्वच्छ छवि बनाएका नेता थिए।
उनी गत वर्ष सम्पन्न भएको स्थानीय तहको निर्वाचनमा बगनासकाली गाउँपालिकामा उपाध्यक्षको उम्मेदवार बनेका थिए। शनिबार बिहान कालीगण्डकी नदीको राम्दीघाटमा पाण्डेयको अन्त्येष्टि गरिँदै छ।
Shares
प्रतिक्रिया