युनिकोड
दाङमा म्याद थप्न लगिएका एक अभियुक्त अदालतबाटै फरार भएका छन्।
सुन चोरीको अभियोगमा पक्राउ परेका घोराही उपमहानगरपालिका वडा नं. १७ का २२ वर्षीय लक्ष्मण विश्वकर्मालाई प्रहरीले म्याद थप्न जिल्ला अदालतमा लगेको थियो।
बिहीवार साँझ ५ बजे अदालत परिसरबाटै उनी भागेका हुन्। सुन चोरी अभियोगमा बुधबार पक्राउ परेका विश्वकर्मालाई आज अदालत लगिएको थियो।
उनलाई न्यायाधीश समक्ष पेश गर्ने क्रममा शौचालय गएका थिए। त्यही क्रममा उनी शौचालयको झ्यालबाट भागेको दाङका प्रहरी प्रवक्ता डीएसपी राजन गौतमले बताए।
उनी शौचालयको झ्यालबाट निस्किएर अदालतको पर्खाल नाघेर फरार भएका थिए। विश्वकर्माको खोजी भइरहेको डीएसपी गौतमले बताए।
‘शौचालय जान्छु भनेर गयो। २ तला माथि शौचालयमा गएर पछाडिको सिसाको झ्याल खोलेर हाम फालेछ। एक जना प्रहरी साथमा थिए। उ ज्यानको माया मारेर हाम फालेको, प्रहरी भर्याङबाट झर्दै गर्दा उ भागिहाल्यो’ डीएसपीले गौतमले भने।
प्रतिक्रिया