कविता : समर्पित प्रतिभाहरू

प्वालैप्वाल भएको छाता जस्तो सडक
र च्यातिएको लगौँटी जस्तो
पुल र घेराबेरा गर्ने इन्जिनियरहरू,
एकै बर्खामा बग्ने सडकको ठेक्का
पटकपटक पास गर्ने ओभरसियरहरू,
फाइलमा पक्की र फिल्डमा कच्ची
नक्सा कोर्ने आर्किटेक्टहरू,

कमिसनको हिसाब मिलाउँदा मिलाउँदै
रिटायर भएर पनि हैकम नछोड्ने
अड्डाका हाकिम साहेबहरू,
नाथे तलबलाई सितन बनाएर 
'रेडलेबल' घुट्क्याउने खाँट्टी राष्ट्रवादी राष्ट्रसेवकहरू,
यस देशमा 
विकास निर्माणको काममा
र, लोकतन्त्रलाई संस्थागत गर्ने सवालमा
युगौंदेखि समर्पित छन्।

यी होनहार प्रतिभाहरूको योगदानको मूल्याङ्कन
यस देशमा कहिले हुन्छ?
यी समर्पित प्रतिभाहरूको अभिनन्दन 
हाम्रो लोकतन्त्रमा कसरी हुन्छ?