युनिकोड
सशस्त्र प्रहरी बल नेपालले सुनसरीको इटहरीबाट ठूलो परिमाणमा गाँजा बरामद गरेको छ। शनिबार राति भएको विशेष सूचनाको आधारमा ५ हजार किलो गाँजा बरामद गरिएको हो।
सशस्त्र प्रहरी बल कोसी प्रदेशका अनुसार इटहरी उपमहानगरपालिका–५ स्थित स्यार्सेकाली पेट्रोल पम्पमा रोकेर राखिएका दुईवटा ट्रकबाट यो ठूलो परिमाणको गाँजा बरामद गरिएको हो। ना ४ ख २९०१ नम्बरको ट्रक र बा ५ ख ११६९ नम्बरको मिनी ट्रकबाट कुल १५८ बोरा गाँजा बरामद गरिएको छ।
बरामद गरिएको गाँजाको वजन ५ हजार किलो रहेको प्रहरीले पुष्टि गरेको छ। यो मात्रा अहिलेसम्म एकै पटकमा बरामद भएको सबैभन्दा ठूलो परिमाणको गाँजा बरामदी मानिएको छ।
प्रहरीले यस घटनाको थप अनुसन्धान गरिरहेको जनाएको छ। गाँजाको स्रोत, गन्तव्य र यसमा संलग्न व्यक्तिहरूको पहिचान गर्न अनुसन्धान तीव्र पारिएको छ। हालसम्म कुनै व्यक्ति पक्राउ परेको जानकारी सार्वजनिक गरिएको छैन।
दुवै ट्रक पेट्रोल पम्पमा रोकेर राखिएको अवस्थामा फेला परेको भएपछि ट्रक चालक र यसमा संलग्न अन्य व्यक्तिहरूको खोजी भइरहेको छ। प्रहरीले यो अवैध गाँजाको ओसारपसारमा संगठित गिरोहको संलग्नता रहेको आशङ्का गरेको छ।
प्रतिक्रिया