कुष्ठरोग भएको शंकामा गाउँलेको डरले ६ वर्षदेखि छाउगोठमा, उद्धारपछि जाँच्दा त्यो रोग नभएको पुष्टि

कुष्ठरोगको आशंकामा ६ वर्षदेखि छाउगोठमा बसिरेहका हुम्लाको सिमकोट गाउँपालिका-८, याङगु गाउँका ५६ वर्षीय धनवीरे कामीको उद्धार गरिएको छ।

प्रमुख जिल्ला अधिकारी नारायण पाण्डेयको समन्वयमा जिल्ला अस्पतालको टोलीले शनिबार गाउँमै पुगेर एम्बुलेन्समार्फत बिरामी कामीको उद्धार गरेको स्वास्थ्य सेवा कार्यालयका प्रमुख डा उमाकान्त तिवारीले जानकारी दिए।

उनले भने,“ कामीको जिल्ला अस्पतालमा उपचार थालिएको छ। उनलाई आफन्तले कुष्ठरोगी भने तापनि कुष्ठरोग नभएको पुष्टिसमेत भएको छ। तर उनको अन्य स्वास्थ्य परीक्षणपछि मात्र के रोग हो भन्ने पत्ता लाग्छ।” 

स्वास्थ्य सेवा कार्यालयले बिरामी कामीको निःशुल्क उपचार गर्ने अस्पताल प्रमुख डा तिवारीले जानकारी दिए।

उनका अनुसार कामीको खुट्टा र शरीरका केही भाग नचल्दा  शारीरिक रूपले अपांगताजस्ता भएका छन्।

साथै हातखुट्टाका औँला बांगा छन् भने हिँडडुल गर्न पनि कठिन छ। घरपरिवार एवं गाउँलेले अन्धविश्वासका कारण उनीलाई छाउगोठमा राखेका जनाइएको छ।

छाउगोठमा बस्दा उनीले  उचित उपचार र हेरचाहको अभाव झेल्दै आएका थिए। रातदिन चिसो, भोक र वेदनाका बीच जिउन बाध्य भएका कामीलाई केही राहत भएको आफन्त जसपाल कामीले बताए।

उनको हेरचाहका लागि भाइले प्रत्येक महिनाको पालो राखेका थिए।

घरपरिवारले घरमै बस्न भने पनि गाउँलेको डरत्रासले छाउगोठमा राख्नुपरेको परिवारका सदस्यले बताएका छन्।