युनिकोड
भारतको मुम्बईबाट गुवाहाटीका लागि उडेको इन्डिगो विमानलाई खराब मौसमका कारण गन्तव्यमा पुग्न १२ घण्टा लागेको छ।
समाचार एजेन्सी पीटीआईका अनुसार शुक्रबार राति नै गुवाहाटी पुग्नुपर्ने विमान डाइभर्सनका कारण १२ घण्टा ढिला शनिबार बिहान ११ बजे मात्र त्यहाँ पुगेको हो।
खराब मौसमका कारण मुम्बईबाट आएको यो विमानलाई पहिले कोलकातातर्फ डाइभर्ट गरिएको थियो तर त्यहाँ पनि मौसम खराब भएपछि भुवनेश्वरतर्फ पठाइएको थियो। तर त्यहाँ पनि धावनमार्ग बन्द भएकाले अन्ततः बंगलादेशको राजधानी ढाकास्थित विमानस्थलमा अवतरण भयो।
एयरलाइन्सले विज्ञप्ति जारी गर्दै ढाकादेखि गुवाहाटीसम्मको उडान वैकल्पिक चालक दलको व्यवस्था गरी यस अवधिमा यात्रुको सुविधालाई ध्यानमा राखिएको जनाएको छ।
उक्त विमानमा अखिल भारतीय कांग्रेस कमिटीका प्रतिनिधि सुरजसिंह ठाकुर पनि थिए। उनले सामाजिक सञ्जाल ट्विटरमा लेखेका छन्, ‘अन्ततः हामी गुवाहाटी पुग्यौँ। १२ घण्टाको उडानमा युरोप पुग्न सकिन्थ्यो तर गुवाहाटी पुग्दा पनि खुसी छु। मेरो महान् राष्ट्र। धन्यवाद!’
प्रतिक्रिया