युनिकोड
जम्मु–कश्मीरको पर्यटकीय क्षेत्र पहलगाम भन्ने स्थानमा मंगलबार भएको आतंकवादी हमला अहिले चर्चामा छ। उक्त आक्रमणमा एक नेपालीसमेत मारिएपछि यो घटनाको चासो नेपालमा पनि बढेको छ।
भारतीय सञ्चारमाध्यमका अनुसार मंगलबार दिउँसो २:४५ बजे पहलगामको बैसरन उपत्यकामा भएको आतंकवादी आक्रमणमा २८ जना मारिएका छन्।
जसमा रुपन्देहीको बुटवल उपमहानगरपालिका–११, कालिकानगरका सुदीप न्यौपाने पनि मारिएको परराष्ट्रमन्त्री डा. आरजु राणा देउवाले बताएकी छन्। घटनामा उनकी आमा रेनु पनि घाइते भएकी छन्। सुदीप आमासहित पहलगाम घुम्न गएका थिए।
यसैबीच धेरैलाई जिज्ञासा लाग्न सक्छ- पहलगाम कस्तो ठाउँ हो?
पहलगाम कश्मीरमा अवस्थित एक पहाडी क्षेत्र हो। यहाँको पहाडी मार्ग उत्तरपूर्वमा अमरनाथ गुफा मन्दिरसम्म पुग्छ, जुन एक हिन्दु तीर्थस्थल हो र अमरनाथ यात्राको तीर्थस्थल पनि हो।
नजिकैको ओभेरा अरु खैरो भालु र कस्तुरी मृगलगायतका वन्यजन्तुको बासस्थान हो। उत्तरपूर्वमा लिद्दर नदी सुन्दर बेताब उपत्यका हुँदै बग्छ। सोही क्षेत्रको दक्षिणपूर्वमा तुलियन ताल पहाडका चुचुराले घेरिएको छ र जाडोमा प्रायः जमेको हुन्छ।
पहलगाम विकास प्राधिकरणको वेबसाइटमा उपलब्ध जानकारीअनुसार पहलगाम दुई शब्द पहल र गाम मिलेर बनेको छ। पहलको अर्थ गोठालो र गामको अर्थ गाउँ हो। त्यसैले पहलगामको पूरा अर्थ ‘गोठालाहरूको गाउँ’ हो।
हरिया घाँसे मैदान र सफा पानीका कारण पहलगामले हरेक वर्ष विश्वभरबाट हजारौँ पर्यटकलाई आकर्षित गर्छ।
यो अनन्तनाग जिल्लाको अनन्तनागबाट ४५ किलोमिटर (२८ माइल) टाढा लिद्दर नदीको किनारमा २,२०० मिटर (७,२०० फिट) को उचाइमा छ। पहलगाम अनन्तनाग जिल्लाका एघार तहसीलमध्ये एकको मुख्यालय हो।
पहलगामको आफ्नै रेलवे स्टेसन छैन। यसको नजिकको रेलवे स्टेसन उधमपुर हो र यो पहलगामबाट २१७ किलोमिटर टाढा छ। पर्यटकहरू जम्मु तवी रेलवे स्टेसन भएर पनि पहलगाम पुग्छन्।
पहलगाममा केही प्रसिद्ध ठाउँ छन्। जुन घुम्न लायक स्थानमा पर्छन्। यो आफ्नो प्राकृतिक सौन्दर्यका कारण विश्वभर प्रसिद्ध छ। यसबाहेक अरु उपत्यका, बेताब उपत्यका, चन्दनवाडी, लिद्दर पार्क र कोलाहोई ग्लेसियर पहलगाममा घुम्न लायक ठाउँ हुन्।
प्रतिक्रिया