फिल्म ‘महाभोज’ हेरेपछि प्रचण्डको अपिल: आजको पुस्ताले एकपटक अवश्य हेरेर गहिरो भाव बुझून्

नेकपा माओवादी केन्द्रका अध्यक्ष पुष्पकमल दाहाल प्रचण्डले लामो समयपछि आइतबार हलमा गएर फिल्म हेरेका छन्। 

पूर्वप्रधानमन्त्री प्रचण्डले आइतबार काठमाडौँको सिटी सेन्टर हलमा गएर ‘महाभोज’ चलचित्र हेरेका हुन्।

फिल्म निकै चाखलाग्दो, तथ्यपरक, यथार्थपरक र सन्देशमूलक लागेको उनले बताएका छन्। 

महाभोज हेरेपछि उनले लेखेका छन्, ‘त्याग र बलिदानबाट सामन्तवादको अन्त्य भए पनि यसको केही अवशेष अझै बाँकी छन्। ‘यही देशमै केही गर्नुपर्छ, गर्न सकिन्छ’ भन्ने अठोटका साथ समाज परिवर्तनका लागि लडेका योद्धाहरू अझै पनि सामन्तवादका विरुद्ध लड्ने साहस राख्छन्, र एकदिन समाज परिवर्तन गरेरै छाड्छन् भन्ने सन्देश यो चलचित्रले दिन खोजेको छ।’

दिनेश राउत निर्देशित महाभोजमा दुई पूर्वमाओवादी लडाकु शान्ति प्रक्रियामा आएर सहकारीमार्फत आर्थिक क्रान्तिमा अघि बढेको कथा छ। यो फिल्मलाई सहकारीपीडितले मन पराएका छन्। 

फिल्ममा दयाहाङ राई, खगेन्द्र लामिछाने, अञ्जना बराइली, गौमाया गुरुङलगायतले अभिनय गरेका छन्।