युनिकोड
कृषा चौलागाईँको निर्देशनमा बन्ने फिल्म ‘पारस’ को गीत रेकर्डिङ कार्य सुरु भएको छ।
केपी फिल्म्सको ब्यानरमा निर्माण हुन लागेको यस चलचित्रको पहिलो गीतका लागि गायन रियालिटी शो ‘नेपाल आइडल सिजन ३’ की विजेता सज्जा चौलागाईँले स्वर दिएकी छन्।
उक्त गीतमा संगीतकार तथा गायक कोशिस क्षेत्रीको शब्द र संगीत रहेको छ। आफ्ना चलचित्रमा व्यावसायिक र स्तरीय गीत संगीत समावेश गर्न रुचाउने निर्देशक चौलागाईँ हाल गीतलाई उत्कृष्ट बनाउने काममा व्यस्त छिन्।
यो फिल्म एक्सन तथा सामाजिक कथावस्तुमा आधारित रहनेछ। फिल्ममा निखिल उप्रेती,जसिता गुरुङ,सुशील श्रेष्ठ, प्रियंका कार्की र निरुता सिंह लगायतको मुख्य भूमिका रहेको छ। घोषणाको समयदेखि नै चर्चामा रहेको यस चलचित्रमा नाम चलेका स्थापित कलाकारहरू एकपछि अर्को गर्दै जोडिएपछि सिने क्षेत्रमा यसको उत्सुकता थप बढेको छ।
फिल्मको पटकथा भारतीय लेखक सचिन लादियाले तयार पारेका हुन् भने यसको छायांकनको जिम्मेवारी पुरुषोत्तम प्रधानले पाएका छन्। निर्माण टिमले हालसम्म अन्य प्राविधिक तथा बाँकी कलाकारहरूको नाम गोप्य नै राखेको छ।
गीत रेकर्डिङको काम अगाडि बढेसँगै निर्माण पक्षले चलचित्रलाई छिट्टै छायांकनमा लैजाने तयारी थालेको छ।
प्रतिक्रिया