रूचाइयो रोशनीको मुख्य भूमिका रहेको ‘लालिमा’ को ट्रेलर, एक दिनमै यु्ट्युव ट्रेन्डिङमा

चुनावका कारण फिल्मी गतिविधि नभएको बेला फिल्म ‘लालिमा’को सार्वजनिक ट्रेलर ट्रेन्डिङमा परेको छ। शनिबार सार्वजनिक यस ट्रेलर चौबीस घण्टा नबित्दै युट्युबको फिल्मतर्फ ट्रेन्डिङ नम्बर ५ मा पर्न सफल भएको हो ।

लेखक तथा निर्देशक रोशन मिराजले यौनकर्मीहरूको वास्तविकतालाई पर्दामार्फत् उजागर गर्ने उद्देश्यले बनाएको यस फिल्ममा अभिनेत्री रोशनी कार्की मुख्य भूमिकामा छन्। उनलाई यौनकर्मीको चरित्रमा देखाइएको छ। ट्रेलरले उनी र नायक जीवन प्रेमसम्बन्धमा रहेको बताउँछ।

यौनकर्ममा लागेकी ‘लालिमा’को जीवनमा आउने उत्तारचढावको कथामा फिल्म बनेको ट्रेलरले संकेत गर्छ। ट्रेलरको अन्तिममा रोशनी मानसिक समस्यामा परेको देखिन्छ। ट्रेलरले यौनकर्ममा लागेकी ‘लालिमा’को बच्चा जन्मिएको घटनामार्फत् फिल्मप्रति सन्सपेन्स छाडेको छ ।

फेथ आस्थाको प्रस्तुतिमा बनेको यस फिल्मकी कार्यकारी निर्माता रीना लामा हुन्। यस फिल्ममा रोशनीसहित जीवन भट्टराईका साथमा उषा रजक, सुष्मा निरौला, घनश्याम जोशी, सबिन कट्टेल र शिशिर वाङ्देलको अभिनय छ। यो फिल्म फागुन २९ मा प्रदर्शनमा आउँदैछ।