‘बलिदान’ का चार पोस्टर सार्वजनिक, ऋचादेखि अटाए सन्तोष सेन पनि

बहु प्रतीक्षित नेपाली चलचित्र 'बलिदान' ले आफ्नो प्रचार अभियानलाई थप सशक्त बनाउँदै ४ मुख्य पात्रहरूको क्यारेक्टर पोस्टर सार्वजनिक गरेको छ। बुधवार सार्वजनिक गरिएको पोस्टरमार्फत अर्पण थापादेखि ऋचा शर्मा,  हेमन्त बुढाथोकी र निर्देशक तथा कलाकार सन्तोष सेनको अटाएका छन्। यी चारैजनाको पात्रलाई पोस्टरमार्फत दर्शकसामु पहिलो पटक प्रस्तुत गरिएको हो।

टिजर सार्वजनिक हुनु अगावै चलचित्रका केही विशेष पात्रहरूमध्ये कथामा गहिरो प्रभाव छोड्ने यी अनुहारहरूलाई पहिलो पटक दर्शकसामु प्रस्तुत गरिएको निर्देशक सन्तोष सेनले बताए। 

फिल्मको फरक र प्रभावशाली भूमिकामा देखिएका कलाकारहरूमध्ये हेमन्त बुढाथोकी सयौँ चलचित्रमा खलनायकको रूपमा आफ्नो गहिरो छवि बनाइसकेका अनुभवी कलाकार हुन्। निर्देशक सेनले हेमन्तको भूमिकाबारे उल्लेख गर्दै भनेका छन्, "जसको उपस्थितिले पर्दामा मात्र होइन, कथाको हड्डी नै काँप्छ।"

त्यस्तै, संवेदनशील र गहिरा भूमिकामा आफूलाई साबित गरिसकेका अभिनेता अर्पण थापालाई निर्देशकले यस्तो पात्रका रूपमा प्रस्तुत गरेका छन्, 'जसको आँखाबाट शब्दहरू बोल्छन् र चरित्रको पीडा, विद्रोह र सत्यता दर्शकले महसुस गर्नेछन्।'