युनिकोड
काठमाडौँ महानगरपालिकाले खाना पकाउने ग्यास र सवारीसाधनमा प्रयोग हुने इन्धनको कृत्रिम अभाव सिर्जना गर्ने तथा कालोबजारी गर्नेलाई कारबाही गर्ने चेतावनी दिएको छ।
उपभोक्ताबाट ‘ग्यास हुँदाहुँदै छैन’ भनेर ग्राहकलाई नदिने, ‘अब ग्यास पाइँदैन’ भनेर धेरै मूल्य लिने, इन्धन डिपोहरूमा तेल मौज्दात हुँदाहुँदै छैन भनेर उपभोक्तालाई फर्काउने गरिएको गुनासो आइरहेको छ। उपभोक्ताबाट गुनासो आउन थालेपछि महानगरले निगरानी संयन्त्र सक्रिय बनाएको काठमाडौँ महानगरका प्रशासन विभागका प्रमुख महेश काफ्लेले बताए।
‘ग्यास छैन भन्ने गलत सूचना प्रवाह गरेर मूल्य बढी लिने तथा सर्वसाधारणको जनजीवनमा असहज परिस्थिति सिर्जना गर्नेमाथि कारबाही गर्नेछौँ,’ काफ्लेले भने, ‘नेपाल आयल निगमले ग्यासको मूल्य आधा सिलिन्डर ९५५ तोकेको छ। यही मूल्यमा खरिदबिक्री गर्न व्यवसायी र उपभोक्तामा हाम्रो अनुरोध छ।’
ग्यास अभाव हुने आशङ्कामा उपभोक्ताले बढी भण्डारण गर्ने गरेकाले पनि बजारमा अभाव देखिएको उनले बताए। यसरी ग्यास सञ्चिति गर्न थालियो भने माग र आपूर्तिको चक्रमा असर पुग्छ। उपभोक्ताले पनि जिम्मेवारपूर्वक ग्यास माग गर्नुपर्ने बताउँदै उनले भने, ‘सहज जनजीविकाका लागि उपभोक्ता, उद्योग तथा वाणिज्य क्षेत्र र सरकार सबैको समान दायित्व छ। आआफ्ना दायित्व सबैले पूरा गनुपर्छ।’
पेट्रोल पम्पहरूले पनि आफूसँग मौज्दात इन्धन भएर पनि छैन भनी सवारीसाधनलाई उपलब्ध नगराउने सूचना पाइएको जनाउँदै उनले यसमा महानगरले निगरानी थालेको बताए।
ग्यास र इन्धन अभाव सिर्जना गर्ने क्रियाकलाप देखेमा तथ्यमा आधारित विवरण महानगरपालिकाका हटलाइन नम्बर ११८० मा टिपाउन सकिने व्यवस्था मिलाइएको छ। यसरी प्राप्त विवरणका आधारमा महानगरले निगरानी गर्ने जनाएको छ।
ग्यास बिक्रेता महासंघ नेपालका अध्यक्ष ज्ञानेश्वर अर्यालका अनुसार भारतबाट आउने ग्यास अहिलेसम्म नियमित छ। उनले सञ्चितिका लागि माग नगर्न उपभोक्तासँग आग्रह गरेका छन्।
प्रतिक्रिया