काठमाडौंको सुन्धारामा रहेको सिभिल मलका व्यापारीहरु भाडा मिनाहाको माग गर्दै आन्दोलनमा उत्रिएका छन्।
बुधबार व्यापारीहरु मलअगाडि ब्यानर र प्लेकार्डसहित उभिएर आन्दोलन गरेका हुन्। उनीहरुले कोरोना संकटसँगै जारी लकडाउनले व्यापार नभएको अवस्थामा भाडा मिनाहा र सहुलियत दिन माग गर्दै आन्दोलनमा उत्रिएका हुन्।
यसअघि काठमाडौं मलका व्यवसायीले पनि भाडामा सहुलियत माग गर्दै आन्दोलन गरेका थिए।
लकडाउनले व्यापार चौपट भएको अवस्थामा भाडा तिर्न नसक्ने भन्दै विभिन्न मलका व्यवसायीले माग गर्दै आएका छन्।
मल सञ्चालक जिम्मेवार बन, सिभिल मल बन्द छ जस्ता नारा लिखित ब्यानर कार्ड बोकेर उनीहरुले विरोध गरेका छन्।
सिभिल मल व्यापार संघका उपाध्यक्ष धनवीर श्रेष्ठले लकडाउन अवधिको पूरै भाडा छुट गर्नुपर्ने माग गर्दै १० दिनयता प्रदर्शन गरिरहेको बताए।
उनले मल सञ्चालकले वार्ताका लागि अहिलेसम्म नबोलाएको र सञ्चालकसँग समझदारी नहुँदासम्म आन्दोलनलाई जारी राख्ने बताए।
प्रतिक्रिया