युनिकोड
कतारमा नेपालले हरियो तरकारीको पहिलो खेप निर्यात गरेको छ।
त्रिभुवन विमानस्थलस्थित भन्सार कार्यालयमा एक समारोहका बीच हरियो तरकारी कतार पठाइएको हो।
ग्रामीण विकासका लागि चाइना फाउन्डेसन (सीएफआरडी)को कृषि प्रवर्द्धन कार्यक्रममा नेपाली किसानले फलाएको तरकारी बिहीबार कतार पठाइएको हो।
समारोहमा सीएफआरडीका पदाधिकारी, कार्यक्रममा आबद्ध नेपाली उत्पादकलगायतले कतारी अधिकारीहरूलाई तरकारी हस्तान्तरण गरेका थिए।
कतार पठाइएका तरकारीहरुमा अकबरे खुर्सानी, सिमी, तीते करेलालगायत छन्। सीएफआरडीको कृषि प्रवर्द्धन कार्यक्रमअन्तर्गत काठमाडौंको दक्षिणकाली नगरपालिकामा उक्त तरकारी खेती गरिएको थियो।
सीएफआरडीले चिनियाँ कृषिशैली नेपालमा हस्तान्तरण गर्ने उद्देश्यले यो कार्यक्रम गरिरहेको छ। सीएफआरडीले सुरुमा प्लम्बिङ र इलेक्ट्रिसियनको सीप विकासमा यो कार्यक्रम केन्द्रित गरेको थियो। त्यसपछि सन् २०२३ मा भने अफसिजन तरकारी खेतीमा तारकेश्वर नगरका किसानलाई तीनमहिने विशेष तालिम दिएको थियो।
सीटीईभीटीसँग मिलेर दिइएको तालिमसँगै सीएफआरडीले आवश्यक कृषि यन्त्र र सामग्री पनि उपलब्ध गराएको थियो। त्यसपछि यो कार्यक्रम एन–एग्रो प्रालिसँग मिलेर सीएफआरडीले दक्षिणकाली नगरपालिकामा विस्तार गरेको थियो। यसअन्तर्गत उत्पादित तरकारी बाली कतार निर्यात गरिएको सीएफआरडीले जनाएको छ।
प्रतिक्रिया