नेपाल ईभी एक्स्पो भदौ १५ देखि

आगामी भदौ १५, १६ र १७ गते काठमाडौंको भृकुटीमण्डपमा नेपाल ईभी एक्स्पो सुरू हुने भएको छ।

इलेक्ट्रिक भेइकल म्यानुफ्याक्चरर्स एन्ड इम्पोर्टर्स असोसिएसन अफ नेपाल (ईभीएमआईएन), मीडिया स्पेस सोलुसनस तथा फ्युचरएक् ट्रेड फेर एण्ड इवेंट्स को सयुक्त आयोजनामा एक्सपो हुन लागेको हो।

नेपालमा विद्युतीय सवारीको प्रयोगलाई प्रोत्साहन गर्ने उदेश्यका साथ एक्स्पो आयोजना हुन गइरहेको आयोजकले जानकारी गराएका छन्।

विद्युतीय सवारीलाई प्रवर्द्धन तथा प्रोत्साहन गर्ने उदेश्यले ३ दिनसम्म सञ्चालन हुने एक्स्पोमा १०० भन्दा बढी प्रतिष्ठित कम्पनीहरूको सहभागिता र १५० भन्दा धेरै ब्रान्डका गाडी तथा विद्युतीय सामग्रीहरु प्रदर्शनीका लागि राखिने आयोजकले जनाएका छन्।

एक्स्पोमा विशेष गरी विद्युतीय कार, विद्युतीय स्कुटर, मोटरसाइकल, साइकल, विद्युतीय बस, रिक्सा तथा विद्युतीय चार्जिङस्टेसन, ब्याट्री तथा अन्य विद्युतीय सामग्रीहरू, अटोकम्पोनेन्ट, टायर, ब्याट्री, ग्यारेज इक्यूपमेन्ट्स, चार्जिङ स्टेसन लगायत बैंक तथा इन्स्योरेन्स कम्पनीहरुको सहभागिता रहने छ।

यसका साथै व्यापार तथा वित्तीय क्षेत्रका नेतृत्वकर्ता, अटोमोटिभ सोरुमका सञ्चालक, डिलर, बिक्रेता, आयातकर्ताहरू, सरकारी अधिकारी, कर्पोरेट हाउस, नयाँ लगानीकर्ता लगायत सबैका लागि यो साझा चौतारी हुने तथा प्रदर्शनीले विद्युतीय गाडीको क्षेत्रमा नयाँ आयाम थप्नुका साथै साझेदारीका लागि नयाँ लगानीकर्ताहरूलाई पनि प्रोत्साहित गर्ने र विद्युतीय यातायातका क्षेत्रमा भएका पछिल्ला विकासहरू पनि प्रदर्शनीमा देख्न पाइने आयोजकले जानकारी गराएका छन्।

पछिल्ला दशकहरूमा विद्युतीय गाडीको लोकप्रियता बढ्दो क्रममा रहेको छ। यसका साथै उत्पादित विद्युत खपत बढाउनका लागि पनि पहिलो प्राथमिकतामा विद्युतीय सवारी रहेकोले प्रवर्द्धन गर्न लागिएको जनाइएको छ। विद्युतीय यातायातको सुविधाले परम्परागत गाडीहरूले निम्त्याउने स्वास्थ्यका साथै जलवायु परिवर्तनका समस्याहरू पनि कम गर्दछ। यसरी विद्युतीय गाडीको प्रयोगले वैकल्पिक ऊर्जाहरूको खपतलाई प्रोत्साहन गर्दै देश भित्रै क्लिन इनर्जीको खपत बढाउँछ।

यसका साथै प्रदर्शनीले पछिल्ला दिनमा विद्युतीय गाडीका क्षेत्रमा भएका विकास र परिवर्तनलाई पनि जनमानसमा सूचित गर्ने बताइएको छ। गत आर्थिक बर्षको तथ्यांक हेर्ने हो भने  आयातका हिसाबले कार जिप भ्यानको शिर्षकमा विद्युतीय सवारीको हिस्सा झन्डै ४० प्रतिशत रहेको छ भने विद्युतीय दुइ पांग्रे, रिक्सा माइक्रोबस बस तथा अन्य सवारी साधनहरुमा पनि उल्लेख्य रुपमा बढेको छ। आउने वर्षहरुमा विद्युतीय सवारीको बजार क्षेत्र अझै विस्तारित हुँदै जानेमा कुनै शंका छैन।

हालका दिनहरुमा प्रायजसो ग्राहकहरुको रोजाइ विद्युतीय सवारी नै हुने गरेको र आर्थिक मन्दीको अवस्थामा पनि विद्युतीय सवारीहरु राम्रोसँग बिक्री भै रहेको ईभीएमआईएनका अध्यक्ष तथा यस एक्स्पोका सम्योजक श्याम सुन्दर सापकोटाले बताए।

ईभीएमआईएनको उदेस्य र कार्यक्रमहरु माथि थप प्रस्ट पार्दै सापकोटाले, ईभीएमआईएन विद्युतीय सवारी साधन सम्बन्धी काम गर्ने आयतकर्ता, निर्माणकर्ता, व्यवसायी, डिलर, चार्जिङ स्टेसन सन्चालक सबैको साझा संस्था रहेको र बिगत ११ वर्षदेखि विद्युतीय सवारीको प्रवर्द्धन, विस्तार तथा नीति निर्माणको काममा सहयोग गर्दै आएको इतिहास बोकेको संस्था हो।

यो एक्स्पो ईभीएमआईएनको आयोजनामा हुन गै रहेको पहिलो कार्यक्रम भएतापनि भविष्यमा पनि यसलाई निरन्तरता दिने र अझै परिस्क्रित गर्दै लगिने सापकोटाले बताए।