बिर्तामोडको द किंग्सबरी होटलको आम्दानी ५ करोड १७ लाख

होटल द किंग्सबरी प्रालिले सन् २०२२ को आठ महिनामा ५ करोड १७ लाख रुपैयाँ आम्दानी गरेको छ। 

सन् २०१६ मार्चदेखि सञ्चालनमा आएको कम्पनीले झापाको बिर्तामोडमा पाँचतारे होटल सञ्चालन गर्छ। 

८२ कोठा रहेको होटलले सन् २०२१ को मध्यअगष्टदेखि स्पा र क्यासिनोबाहेक आंशिक रुपमा सेवा सुरु गरेको थियो। सन् २०२१ मार्च १९ मा होटलले नाम परिवर्तन गरेको थियो। यसअघि होटल ग्रान्ड प्रिन्स प्रालि रहेकामा परिवर्तनसँगै द किंग्सबरी प्रालि रहेको थियो। 

यसको पूरै स्वामित्व प्रकाश गोतामेको रहेको छ। यो होटल स्वदेशी वा विदेशी कुनै पनि चेनसँग जोडिएको छैन। पर्यटन विभागले यसलाई पाँचतारेको मान्यता दिएको छ। सन् २०२१ अक्टोबरमा पाँचतारे मान्यता पाएको यसको अवधि पाँच वर्षसम्मका लागि हो।