ललितपुरको हात्तीवनस्थित फर्निचर उद्योगमा आगलागी हुँदा एकजनाको मृत्यु, शव चिनिएन

ललितपुरको हात्तीवनस्थित एक फर्निचर उद्योगमा आगलागी हुँदा एक जनाको मृत्यु भएको छ।

जिल्ला प्रहरी परिसर ललितपुरका प्रवक्ता एसपी नरेश सुवेदीका अनुसार ललितपुर महानगरपालिका-२३, हात्तीवनस्थित सिक्मा मेटल इन्टेक्स प्रालिमा भएको आगलागीमा परी एक पुरुषको मृत्यु भएको हो।

‘शव डढेको अवस्थामा रहेकाले मानिस पहिचान हुन सकेको छैन’, एसपी सुवेदीले नेपालखबरसँग भने, ‘मुचुल्का उठाएर पोस्टमार्टमका लागि शव अस्पताल लाने तयारी गरिरहेका छौँ।’

शव पुरुषको भन्नेचााहिँ चिनिएको तर मानिस नचिनिएको उनले बताए। ‘त्यहीँ काम गर्ने मानिस पनि हुनसक्छ अथवा बाहिरको पनि हुनसक्छ’, उनले भने, ‘यस विषयमा बुझ्दै छौँ।’

एसपी सुवेदीका अनुसार फर्निचर उद्योगमा आगलागी भएको भनी स्थानीयले शनिबार बिहान ६ बजे प्रहरीलाई खबर गरेका थिए। त्यसलगत्तै दमकलसहित घटनास्थल पुगेको प्रहरीको टोली आगो निभाउने क्रममा भित्र पुरुषको शव फेला पारेको हो।