युनिकोड
नेपाल एपीएफ क्लबका तीव्र गतिका बलर कमलसिंह ऐरी प्रधानमन्त्री कप एकदिवसीय राष्ट्रिय क्रिकेट प्रतियोगिताको सर्वोत्कृष्ट खेलाडी घोषित भएका छन्।
कमलले ६ खेलमा १० विकेट लिँदै सर्वोत्कृष्ट खेलाडी बन्न सफल भएका हुन्। उनले गण्डकी प्रदेशसँग ४, आर्मीसँग ३, पुलिससँग २ र आर्मीसँग १ विकेट लिएका थिए। सर्वोत्कृष्ट खेलाडी बनेका कमलले ५० हजार रुपैयाँ प्राप्त गरे।
त्रिभुवन आर्मी क्लबका स्पिनर साहब आलम प्रतियोगिता उत्कृष्ट बलर बने। साहबले ५ खेलमा ४५.४ ओभरमा ८ मेडनसहित १ सय ५२ रन खर्चेर कुल १२ विकेट लिएका थिए। आर्मीलाई उपाधि जिताउन साहबले फाइनलमा एपीएफविरुद्ध ३ विकेट लिएका थिए। साहबले कर्णालीसँग ३, प्रदेश १ सँग ४, एपीएफसँग २ विकेट लिएका थिए।
प्रदेश २ का युवा अलराउन्डर विवेक यादव उदीयमान खेलाडी घोषित भए। विवेकले ४ खेलमा १ सय ६७ रन बनाएका थिए। उनले लुम्बिनीसँग ५१ र बागमतीसँग ६६ रन बनाउँदै लगातार अर्धशतक प्रहार गरेका थिए। सुदूरपश्चिमसँग ४१ र पुलिससँग ९ रनमा आउट भए। साथैं उनले ४ विकेट लिए। उनले १५ हजार रुपैयाँ प्राप्त गरेका छन्।
प्रतियोगिताको उत्कृष्ट ब्याट्सम्यान बागमती प्रदेशका पृथु बास्कोटा बने। पृथुले ५ खेलमा २ सय १५ रनमा शीर्ष स्थानमा रहेका थिए। उनले प्रतियोगिता अवधिमा २ अर्धशतक, २२ चौका र ७ छक्का प्रहार गरे। पृथु पुलिससँग ४८ रनमा अविजित रहेका थिए। सुदूरपश्चिमसँग ८४ रनमा अविजित रहँदा प्रदेश २ सँग ५३ रनमा अविजित रहेका थिए। लुम्बिनीसँग २९ रन र आर्मीसँग १ रनमा आउट भएका थिए।
उत्कृष्ट ब्याट्सम्यान र बलरले जनही २५ हजार रुपैयाँ पाएका छन्।
शनिबार भएको फाइनल खेलमा आर्मीले एपीएफलाई ३३ रनले हराउँदै उपाधि उचालेको थियो। सेमिफाइनलमा पुगेका बागमती प्रदेश र नेपाल पुलिस क्लबले ५०–५० हजार रुपैयाँ प्राप्त गरे।
प्रतिक्रिया