‘काठमाडौँ गोर्खाज’ एनपीएलको उपाधि जित्ने लक्ष्यमा

पहिलो पटक आयोजना हुन लागेको नेपाल प्रिमियर लिग (एनपीएल) क्रिकेटमा काठमाडौँ उपत्यकाको प्रतिनिधित्व गरेको ‘काठमाडौँ गोर्खाज’ले प्रतियोगिताको उपाधि जित्ने लक्ष्य राखेको छ।

यही मंसिर १५ गतेदेखि आगामी पुस ६ गतेसम्म सञ्चालन हुने उक्त प्रतियोगिताको सहभागी सबै टोलीलाई पाखा लगाउँदै काठमाडौँ गोर्खाज लिगको प्रथम संस्करणकै उपाधि कब्जा गरेर इतिहास रच्ने दाउमा छ। काठमाडौँ गोर्खाजका मुख्य प्रशिक्षक बसन्त शाही ठकुरीले आफ्नो टोलीले प्रतियोगितामा उत्कृष्ट खेल प्रदर्शन गर्नेमा विश्वस्त रहेको बताए।

‘काठमाडौं गोर्खाज प्रतियोगितामा खाली सहभागी मात्र बन्न चाहन्न, उपाधि नै कब्जा गर्ने लक्ष्यका साथ मैदानमा उत्रिने छ’, उनले भने। यसअघि भैरहवालगायतका स्थानमा अभ्यास खेल खेलेको काठमाडौं गोर्खाजले एनपीएलमा उत्कृष्ट खेल प्रदर्शन गर्ने विश्वास व्यक्त गरे। काठमाडौँ गोर्खाजले श्रीलंका र बंगलादेशका केही खेलाडीसँग अभ्यास खेल खेलेको उनको भनाइ छ।

अक्सनको समयमा काठमाडौं गोर्खाजलाई कमजोर टोली भनिएको प्रसंग उल्लेख गर्दै प्रशिक्षक शाहीले भने, ‘कतिपयले काठमाडौं गोर्खाजलाई ‘अनलक्की’ टोलीसमेत भन्न भ्याए। अक्सनमा हामीलाई भाग्यले त्यति साथ दिएन। तर पनि नेपाली युवा खेलाडी र विदेशी खेलाडीको साथले हाम्रो टोली सन्तुलित बन्न पुगेको छ।’

प्रशिक्षक शाही काठमाडौं गोर्खाज बलिङ र ब्याटिङ दुवैमा उत्कृष्ट रहेको बताउँछन्। काठमाडौं गोर्खाजका मार्की खेलाडी करण केसी थोरै अस्वस्थ भएकाले उनी चिकित्सकको नियमित निगरानीमा रहेको उनले बताए। ‘उहाँले अलिअलि अभ्यास गरिरहनुभएको छ, प्रतियोगिताको उद्घाटन खेल अघि पूर्णरुपमा खेल्न सक्नुहुन्छ भन्नेमा विश्वस्त छु’, प्रशिक्षक शाहीले भने।

काठमाडौँ गोर्खाजले आफनो पहिलो खेल चितवन राइनोजसँग यही मंसिर १७ गते खेल्ने छ। प्रशिक्षक ठकुरी टी-ट्वान्टी क्रिकेटमा कुनै पनि टोलीलाई कमजोर र बलियो भन्न नमिल्ने बताउँछन्। चितवनविरुद्धको पहिलो खेलमा नै काठमाडौँ गोर्खाजले जित निकाल्नेमा उनी विश्वस्त छन्।

काठमाडौँ गोर्खाज काठमाडौं स्पोर्ट्स डेभलपमेन्ट भेन्चरको स्वामित्वमा रहेको छ। काठमाडौं गोर्खाजको मार्की खेलाडीमा राष्ट्रिय टोलीका सदस्य करण केसी छन्। करणले सिनियर टोलीबाट विभिन्न अन्तर्राष्ट्रिय प्रतियोगिता खेलिसकेका छन्।

काठमाडौं गोर्खाजमा करणसँगै राष्ट्रिय टोलीबाट खेलिसकेका भीम सार्की र शाहब आलम छन्। यस्तै यु(१९ बाट खेलेका दिपेश कँडेल तथा अन्य खेलाडीमा रासिद खान, कृष्ण कार्की, सुमित महर्जन, शंकर राना, राजु रिजाल, प्रतीक श्रेष्ठ र विवेक केसी छन्।

त्यसैगरी काठमाडौं गोर्खाजले पाँच विदेशी खेलाडीलाई अनुबन्ध गरेको छ। जसमा नामिबियाका कप्तान जेरार्ड इरासमस, नेदरल्याण्ड्सका माइकल लेभिट, इङ्ग्ल्याण्डका स्टेफेन इस्कीनाजी, डान डौथवेट र नाथन सोटर रहेका छन्।

विभिन्न अन्तर्राष्ट्रिय प्रतियोगिता खेलिसकेका नामिबियाका कप्तान जेरार्डले यसअघि नेपालमा आएर अन्तर्राष्ट्रिय खेल खेलिसकेका छन्। नेदरल्यान्ड्सका माइकलले पनि विभिन्न अन्तर्राष्ट्रिय प्रतियोगिता खेलेका छन्। जेरार्ड र माइकल दुवै ‘एसोसिएट’ देशबाट उत्कृष्ट खेल खेल्ने खेलाडी हुन्।

इङ्ग्ल्याण्डका नाथन सोटरले पनि घरेलु क्रिकेटमा उत्कृष्ट खेल प्रर्दशन गरेका छन्। उनले न्यू साउथ वेल्सको यु-२३ टोलीबाट पनि खेलेका छन्। त्यसैगरी क्यारिवियन क्रिकेट लिग, इन्टरनेशनल क्रिकेट लिग टी-ट्वान्टीलगायतको विश्वको विभिन्न खेल खेलेको अनुभव उनीसँग छ। टोलीको ‘आइकोनिक प्लेअर’मा क्रिस कार्की हुन्। काठमाडौं गोर्खाजको एम्बासडरमा नेपाली राष्ट्रिय महिला टोली कप्तान इन्दु वर्मा छन्।

प्रतियोगिताका लागि माइकल लेभिट भने नेपाल आइसकेका छन्। बाँकी विदेशी खेलाडी यही मंसिर दोस्रो सातासम्म नेपाल आइपुग्ने काठमाडौं गोर्खाजले जनाएको छ।

यसैगरी काठमाडौं गोर्खाजका प्रमुख कार्यकारी अधिकृत सन्देश कटवालले टोलीको ब्यालेन्स राम्रो भएकाले प्रतियोगिताको ट्रफी आफनो टोलीले कब्जा गर्ने दाबी गरे। उनले काठमाडौं गोर्खाजमा युवा खेलाडी धेरै रहनुका साथै राम्रा राम्रा विदेशी खेलाडी भित्र्याएकाले प्रतियोगिताको उपाधि जित्ने विश्वास व्यक्त गरे।

नेपाल क्रिकेट संघ (क्यान) को आयोजनामा हुन लागेको यस नेपाल प्रिमियर लिग (एनपीएफ) हालसम्मकै सबैभन्दा ठूलो घरेलु प्रतियोगिता हो। प्रतियोगितामा काठमाडौँ गोरर्खाजसँगै लुम्बिनी लायन्स, पोखरा एभेन्जर्स, चितवन राइनोज, विराटनगर किंग्स, जनकपुर बोल्ट्स, कर्णाली याक्स र सुदूरपश्चिम रोयल्स गरी आठ टोली सहभागी छन्। प्रतियोगिताको उद्घाटन खेल यही मंसिर १५ गते विराटनगर किंग्स र जनकपुर बोल्ट्सबीच प्रतिस्पर्धा हुनेछ। रासस