तीन दिनदेखि चौकी धाउँदै सोमपाल, प्रहरीले सन्दीपसँग भेट्न दिएन

बलात्कार अभियोगमा प्रहरी बृत्त गौशालाको हिरासतमा राखिएका क्रिकेटर सन्दीप लामिछानेसँग भेट्न नदिएको गुनासो उनका टिममेट सोमपाल कामीले गरेका छन्। 

तीन दिनदेखि गौशाला बृत्त पुग्दै फर्किरहेका उनले अनेक बहानामा प्रहरीले आफूलाई सन्दीपसँग भेट्न नदिएको बताएका छन्। 

'तीन दिनदेखि सन्दीपलाई भेट्न धाइरहेको छु। तर विभिन्न बहाना गरेर भेट्न दिएको छैन', उनले भने, 'कहिले कहाँ लिएर जाने, कहिले कहाँ लिएर जाने भनेर प्रहरीले झुलाइरहेको छ।'

सोमबार पनि बृत्तमा पुगेका सोमपाललाई सन्दीपसँग भेट्न दिएन। सन्दीपलाई सोमबार प्रहरीले म्याद थपका लागि जिल्ला अदालत काठमाडौंमा ल्याएको छ। 

प्रहरीले सरकारी वकिलको रोहबरमा अहिले बयान लिइरहेको छ। सन्दीपले सोमबार काठमाडौं जिल्ला अदालतमा आफू निर्दोष रहेको तर्क गरेका थिए।