क्यानडा भ्रमणमा रहेको नेपाली टोलीले शुक्रबार भएको खेलमा क्यानडाको ओन्टारियो क्रिकेट क्लबलाई ६९ रनले पराजित गरेको छ। शुक्रबारको खेलमा पहिला ब्याटिङ गरेको नेपालले निर्धारित ५० ओभरमा ८ विकेटको क्षतिमा २२० रन बनाएको थियो।
नेपालका लागि विकेटकिपर विनोद भण्डारीले अर्धशतकीय पाली खेलेका थिए। भण्डारीले ५९ बलमा ८ चौकासहित सर्वाधिक ५७ रनको योगदान दिए।
नेपालका ओपनर आसिफ शेख ७५ बलमा ४ चौकासहित ४२ रनमा रन आउट भए। पहिलो विकेटका लागि कुशल भुर्तेल र आसिफ शेखले १३ ओभर ३ बल खेल्दै ४३ रनको साझेदारी गरेका थिए।
देव खनाल ४४ बलमा २ चौकासहित २७ रनमा क्याच भए। दोस्रो विकेटका लागि देव खनाल र आसिफले ५० रनको साझेदारी गरेका थिए। उपकप्तान रोहित पौडेल दर्शिल पटेलको बलमा २ रनमा क्याच आउट भए।
आरिफ शेख अमर खालिदको २६ औं ओभरको अन्तिम बलमा रन आउट भएका थिए। दीपेन्द्रसिंह ऐरी र आरिफ शेख समान १९÷१९ रनमा आउट भए। बसिर अहमदले २६ बलमा २४ रन र आदिल अन्सारीले १० रन जोडे। ओन्टारियोको शील पटेलले १० ओभरमा ३० रन खर्चेर ३ विकेट लिए।
जवाफी ब्याटिङमा उत्रिएको ओन्टारियो ४२ ओभर ५ बल खेल्दै १५१ रनमा अलआउट भयो। नेपालका लागि पवन शर्राफले तीन विकेट लिए।
दीपेन्द्रसिंह ऐरीले ७ ओभरमा २२ रन खर्चेर २ विकेट लिए। आरिफ शेखले ६ ओभरमा १२ रन खर्चेर २ विकेट लिए। किशोर महतोले ६ ओभरमा २३ रन खर्चेर २ विकेट लिए।
नेपालले अब क्यानडासँग दुई एकदिवसीय क्रिकेट खेल्नेछ। उक्त खेलपछि टोली स्कटल्यान्ड जानेछ। क्रिकेट विश्वकप लिग–२ अन्तर्गत नेपाल, स्कटल्यान्ड र नामिबियाबीच त्रिकोणात्मक ओडीआई सिरिज हुनेछ।
नेपाललाई आगमी वर्ष हुने एकदिवसिय विश्वकप ग्लोबल छनोट सोझै खेल्न र ओडीआई मान्यतालाई निरन्तरता दिन दिन बाँकी सबै खेल खेल्नुपर्ने हुन्छ। नेपाल १६ खेलमा ७ मा जित, ८ मा हार र १ खेल टाईका साथ १५ अंक जोड्दै पाँचौं स्थानमा छ।
नेपाललाई सिधै विश्वकप ग्लोबल छनोट खेल्न शीर्ष तीनमा पर्नुपर्ने हुन्छ। अन्यथा प्लेअफ खेल्नुपर्ने हुन्छ। प्लेअफबाट ६ टोलीको खेलमा पुन शीर्ष दुईमा पर्न सके विश्वकप ग्लोबल छनोट खेल्न पाउनेछ। ओडीआई मान्यतालाई निरन्तरता दिन अंक तालिकामा शीर्ष पाँचमा पर्नुपर्ने हुन्छ।
Shares
प्रतिक्रिया