युनिकोड
कप्तान सन्दीप लामिछानेले उत्कृष्ट बलिङ गरे पनि नेपाली अल स्टार्ससँगको पहिलो अभ्यास खेलमा नेपाल ४ विकेटले पराजित भएको छ।
अमेरिका भ्रमणमा रहेको नेपाली राष्ट्रिय क्रिकेट टोलीले बिहिबार राति खेलेको पहिलो अभ्यास खेलमा हार व्यहोरेको हो।
नेपालले दिएको १ सय ९१ रनको लक्ष्य नेपाली अल स्टार्सले ३३.५ ओभरमा ६ विकेट गुमाएर भेट्टायो।
अल स्टार्सको जितमा विपुल शर्माले ५० रनको महतव्पुर्ण योगदान दिए। गौरभ बजाज ४० रनमा नटआउट रहे।
नेपालका लागि कप्तान सन्दीप लामिछाने एक्लैले ५ विकेट लिएपनि टोलीको हार टार्न भने सकेनन्। उनले आफ्नो स्पेलमा १ मेडनसहित ४९ रन खर्चेर ५ विकेट लिए। किशोर महतोले १ विकेट लिए।
त्यसअघि अमेरिकाको ह्युस्टनस्थित पेरिरी भ्यू क्रिकेट कम्प्लेक्समा अलस्टार्सले टस जितेर फिल्डिङ रोजेपछि ब्याटिङ गरेको नेपाल ४५.५ ओभरमा १ सय ९० रनमा अल आउट भयो। आरिफ शेखले ६० रन नटआउट रहे।
पाँचौं विकेटका लागि आरिफ र विनोद भण्डारीले ४७ रनको साझेदारी गरे। ओपनर कुशल भुर्तेल गोल्डेन डकआउट भए।
आसिफ शेख तेस्रो ओभरको तेस्रो बलमा १ रनमा चोटका कारण पवेलियन फर्के। करण केसीले २१ र रोहित पौडेलले १६ रन थपे। अल स्टार्सका लागि मार्टिन कैनले ३ विकेट झारे।
नेपाली टोली आईसीसी लिग–२ अन्तर्गत अमेरिका र ओमानसँगको त्रिकोणात्मक सिरिजका लागि अमेरिका छ। सिरिजअघि नेपालले २ अभ्यास खेल खेल्न लागेको हो। दोस्रो अभ्यास खेल ह्युस्टन हरिकेन्ससँग शनिबार खेल्नेछ।
प्रतिक्रिया