यूएईमा जारी टी-१० क्रिकेट लिगको दोस्रो खेलमा नेपाली लेग स्पिनर सन्दीप लामिछानेको उत्कृष्ट प्रदर्शन रहे तापनि उनको टोली कर्नाटका टुसकेर्स पराजित भएको छ।
आइतबार भएको खेलमा कर्नाटका बंगला टाइगर्ससँग ५ विकेटले पराजित हुँदा सन्दीपले २ विकेट लिएका थिए।
शेख जायद स्टेडियममा कर्नाटकाले दिएको १ सय १५ रनको लक्ष्य बंगलाले ८ ओभर ५ बलमा मात्र ५ विकेट गुमाएर पूरा गर्याे।
बंगलाको जितमा आन्द्रे फ्लेट्चरले ४० रन जोड्दा टम मोरेसले अविजित २८ रन बनाए। सन्दीपले २ ओभरमा २ विकेट लिदामात्रै ९ रन खर्चिए। सन्दीपले एक रन आउटसमेत पारेका थिए। यसअघि दिल्ली ब्लुजसँग भएको खेलमा पनि सन्दीपले १ विकेट लिएका थिए।
यस अघि टस हारेर पहिले ब्याटिङ गरेको कर्नाटकाले १० ओभरमा १ विकेट गुमाएर १ सय १४ रन बनाएको थियो।
कर्नाटकाका लागि जोनसन चार्ल्सले ५७ रनको अर्धशतकीय इनिङ्स खेले । यस्तै कप्तान हसिम अमलाले अविजित ४७ रन बनाए।
समूह ए रहेको कर्नाटका २ खेलमा २ अंक जोडेर पुछारमा छ। बंगलाको यो पहिलो जित हो। बंगला २ खेलमा २ अंक नै जोडेर शीर्ष स्थानमा छ।
Shares
प्रतिक्रिया